Yekfa lferḥ dayen-nni, yal wa yers-d ɣer lεeqel-is. Uzlen yemdanen deg yiberdan, suɣen lḥmala-nsen ɣef tmurt, begnen-d ljehd n wemrar i d aten-yeszdin ɣer-s. Yelha yak wanecta, yiwen ur yezmir ad d-yini ala. Lamaεni i tura ? Amek i d udem n leḥmala-agi ? Neɣ tayri n tmurt tella kan di ddabax ?
Amer ahat, tura yal wa ad iseggem iman-is, akken tamurt ad tesεu udem i s-iwulmen. Amer kra n win yesεean tazmert akken ad iseweq ɣef lqum, ad iseweq akken lεali. Amer ahat timdinin-neɣ ad yekfu fell-asent ddel, ad uɣalent d tizedganin, d timdinin s wawal! Amer srabes yellan ad ddun akken iten-yasarem wul, ad illin i lmend n usishel n timsal ɣer yemdanen. Amer di lakul ad dhun d ttrebga d useɣri d uleqqem n tmusni di dderya-nneɣ. U mazal yella usirem yugaren aya.
Amer tijεel def ferru n timsal t tmusni ad rrent aḍar. Amer kra n win isuɣen s teḥya Lezzayer ad yecrew zdat n waxxam-is, akken ad iḥader agama. Amer ad yuɣal azref n wamdan d win i teddun di tmurt-a. Amer lxir ad iεum di yal tamnaɣi ur tiilin wid yenḥafen. Amer laẓ ad yeknu, idles d tuhski ad ǧuǧgen. Amer deg yiberden-neɣ ad yezdeɣ laman, ṭlam ad yefsi ala tafat n tusna ad yenḍen i wallaɣen n warrac d teḥdayin-neɣ. U mazal yella usirem yugaren aya!
Amer d lebɣi-k a yul tarewla ɣer tmura n berra d yinnig yecban lmut ad yeḥbes. Amer axeddim ad yilli d anṣib n kra n win d-yefɣen si tesnawit. Amer tamεict ad tibnin kra ɣef yimeɣban yenṭeren. Amer ur yettili ara usexleḍ gar ddin yeεnan amden weḥdes d timsal n ddunit i d aɣ-isdkulen merra. U mazal asirem yugaren aya!
Amer tilelli n umeslay d tugdut ad tilli dɣa d tin yellan i lfedya n tmurt mačči i weḥwas n imekwan. Amer ad ggtent rraduwat d tilbizyuwat d tilelliyin ur neqqin ara ɣer ddula,. Amer “le monopole” ḥala ayen iεaden iḍeli.
Lamaεna nugad d teẓwawaṭa kan. Nugad d asigna n unebdu. Nugad ad teḍru am akken id as-yenna umedyaz: “ d wid yettsuɣun i tt-itettan”. Nugad ur d-neffiɣ ara deg yibaxixen d yir tudert. Nugad amer Lezzayer-agi deg nettwet, kra ur yettbedil fell-as! Yiwen ur t-itett wul-is ama tewwa ama terɣa. Nugad amus ad yeqqim d taduli ara yedlen luṣayef-is, agris d win ara yecemten udem-is.
I limer ayen-nni n leêmala di yemaren deg ussan-a yezrin ad –tt-wehin $er yiwen yiswi: “ arfad n tmurt d uswev-ines ɣer yiswir tuklal?
Amer hat yiwwas id as yenna Lwenas deg awal-is!
Ait Slimane Hamid