Si 10 alarmi d 18 Dujember 2009, tamdint n Batna tuɣal d tamanaɣt n umezgun Amaziɣ i d-yellan s ddaw leεnaya n tneɣlaft n yidles akked d lwali n lwilaya n Batna. Deg tfaska -agi ttekant azal n 18 n trebuyaε i d-yekkan si yal tama n tmurt. Axxam n umezgun akked d wexxam n yidles n temdint-agi uɣalen d annar i tmuzɣa akked tẓuri.
Tacquft i-yeṭfen lwelha d tin i d-iεeddan deg ass wis rebεa, s-ɣur tarbaεt n Tamenrast. Tamezgunt i d-wwin d tin umu semman « Tamenahayt », anemk-is « lemri » s teqbaylit. Tacquft-agi teṭṭef lbal acku tewwi-d ɣef ugur i ttemayagarent tilmeẓyin imucaɣ imi di laεwayed n tmeti-agi ttmuddun tullas-nsen ɣef 12 iseggasen. D ayen ara yeǧǧen yiwet n tlemẓit yefɣen akkin ɣer temdint teɣra ad teεreḍ ad tesseɣres leqyud-agi ucmiten. Sin akkin, tella-d diɣ tacequft nniḍen s-ɣur tarbaεt n umezgun n Batna i d yuraren tamezgunt i wumi sawalen « alɣem a buhali » i d-yewwin ɣef wemdan yesruḥen timadint-ines yuɣal yettnadi fella-s armi anda yedda ad yesutur kra yellan i win yemugger : « d acu-yi ? anwa i d nekini ? ». Am wakken diɣ i d aq-ttunefk tagnit ad nwali tacquft n tarbaεt n Biskra i d-yewwin ɣef zwaǧ s ttawil n linternit s tcequft i d-uraran deg axxam n yidles « zawaj.com ». Ɣer tama n timliliyin-agi, llan diɣ isaragen i d-yewwin ɣef udmawen n tira n tcequfin akked d unamek n usuli n tcequfin- agi s ɣur aṭas n imusnawen n uymezgun amedya : Fouziya Ait El Hadj, Hamida Ait El Hadj, Ibrahim Noual, Mohamed Salah Ounisi. Am akken diɣ i d as-tuɣal tajmilt i Bouras Ali Ben Mohamed, Salim Souahli, Said Hilmi yellan d iεeggalen n umezgun acḥal d asseggas aya. Tizi-Wezzu s lǧiha-s tettiki deg tafaska-agi s waṭas n trebuyaε am tarbaεt tadelsant Iẓuran i d-yuraren tamzgunt « Ibturen », tarbaεt Tacemlit i d yuraren « mazal lxir ar zdat » tarbaεt Ḥabib Ben tayeb i d yewwin tacquft « Lunja », tarbaεt n Imuzar i d yewwin yiwet n taceqquft i d-yettmeslayen Ɣef yiwet n tedyant n yiwen udrum, ibɣan ad d-isebgen tiḥerci-ines mgal Lǧiran-nsen, dɣa ẓerεen lemleḥ amzun d yiwen usenfar amaynut ara yeswehmen medden.
Si lǧiha-s tarbaεt n umezgun n Bgayet turared tacqut « le foehn » yura Mouloud Mammeri, wuɣur ara d nezzi d tugett n wawal deg aḍris nniḍen.
Ayen yezmer ad d-nini di tagra: deg timlilit-agi yettban belli amzgun amaziɣ yetlal-d u simmal i teddu ɣer zdat, xas akken mazal atas n lexsas di tira akked d unamek n usali n tmezgutin. Maca, xas akka, azekka n umezgun yeḍmen, imi tura si yal tamnaḍṭ yettmeslayen s tamaziɣt, amezgun yesεa iεeggalen-is, d wid i t-iḥemlen ara s-igen ifadden.
Ait Slimane Hamid