Aseggas-a, aṭas n tmeγriwin i d-ittwaheggan ilmend n yennayer n yimaziγen 2960. Imaziγen yettidiren di tmura n lbarani sudsen-d timeγriwin meqqren ilmend n yennayer, am tiddukla n yedles amaziγ54 n temdint n Nancy sudsen-d yiwet n tmeγra anda ar ad-tecnnu yiwet n tcennayt s wazal-is, tagi d Malika Domrane deg tzeqqa n tmeγriwin n Vandoeuvre ass n sebt 09 yennayer 2010 anda ar ad-yilli ula d imensi. Azekka ni n lḥed 10 yennayer 2010, tiddukla tadelsant ça cartonne n temdint n Noisy, swejden-d yiwet n tmeγra s wahil d amarkanti anda tella temzikent n dḥuḥ n lfeṭa d ufexaṛ imaziγen,γer tama-s tella temzikent n teklut. ahil d-win γezzifen, tella terbaεt iḍebalen n at γebri, tameddit n wass d Malika Domrane ara-yecnun. Seg yidis nniḍen, deg-ayen yeccuden γer yennayer n yimaziγen, Mouhaned Allaoua ula d netta ad-yecnu ass n 5 furar 2010 akk d le Ballet Berbère di temdint n Roubaix ilmend n yennayer imaziγen 2960.
Acu i d yennayer?
Yennayer d ass amezwaru n useggas imaziγen, yebdan lewhi n 590 uqbel talalit n sidna Σisa, aseggas-nni i yerbeḥ ugellid Cacnaq ṭrad i d-yellan gar-as d ifarεunen di Maṣer, mbaεd tagelda tis 22. Yennayer d agur yefilliten i lxir, rrbeḥ,; lerẓaq, talwi, imi t-sfuggulen imaziγen. Amek i d-yettili usfuggel n yennayer? Aṭas n wansayen i d-icudden γer yennayer, xeddemen imensi n yennayer neγ llan wid yeqqaren imensi bu sebεa isufar. Zellun iyuzaḍ,; dγa zik yal aεeggal s uyaziḍ-is, yernu yal yiwen deg-sen ma yewweḍ 17 neγ 18 iseggasen ad yezlu i yiman-is. Xeddmen lwaεda swayen zemren. Mačči d aya kan, llan wansayen nniḍen am ttesḍila tamezwarut i weqcic amectuḥ akken ad yeğhed ucebbub-is. Xeddmen taswiqt anda aqcic ad yawi aqerru n wezger akken ad yuγal d aqerru n wexxam.
Ihi aseggas-nwen mara d-amegaz i yal amaziγ anda yella, anda yebγu yilli.
Islam Bessaci