Mazal anadi deg tantaliwin timaziɣin yettkemmil, ama i usekfel n umawal neɣ i usuddem seg wayen yellan deg-sent. Ulamma tira neɣ almad, ur yesɛi ara lweqt di tudert n umdan, ula d anadi akken-nni. Belqasem Gerbas, d amedya n urgaz, yesɛan tabɣest d lḥir, imi ulamma yedda di leɛmer, maca yeessaweḍ ad yelmed tamaziɣt, syin akkin ad yessuffeɣ amawal n tmaziɣt-tafransist. Inuda deg waṭas n tantaliyin timaziɣin n Tefriqt n Ugafa, ulamma ur yeddi ara s uḍar-is, maca yunag deg yidlisen d yimawalen n tmaziɣt yemxalafen. Dɣa deg wussan-agi kan iɛeddan, i d-yeffeɣ ɣer ssuq umawal amaynut n tmaziɣt, yewwin isem “Kaw Maziɣ”, i yebɣan ad d-yini “Akk Amaziɣ (tamaziɣt)”. Yessuffeɣ-t-id umnadi Belqacem Gerbas, deg taggara n useggas-agi n 2019, yettnuzu di tnedlisin s wazal n 500 DA.
Ma nger tamawt ɣer daxel ad naf, mbeɛd agemmay amaziɣ d awal n tazwara syin d awal ɣef tantaliyin n tutlayt tamaziɣt d wanda i tent-ssawalen. Deg yixef n umawal, yal awal yettak-d asuf d usget n wawal-nni amaziɣ. Ɣer taggara n umawal-agi, yerna-d umaru awitay n tfellaḥt amaziɣ ɣer tama n wagguren s ddeqs n tantaliyin. Ma deg usebtar wis 4 n tduli, iger-d takerḍa n tmurt n tmazɣa d tantalyin i ttmeslayen deg-sen. Afud igerrzen i umeskar.
A. A.