I lmend n yennayer i d-iteddun, imezdaɣ n taddart n Nezla i d-yezgan deg tiɣiwant n Timizart deg At Jennad haggen-d yiwen n wahil s wazal-is. Leqdic-agi d amezweru deg taddart-agi. Yella-d s yifaden n yinelmaden n taddart yassaremen akken ad yuɣal waya d yiwet n lεadda ara d-yettuɣalen yal tikelt mi ara d yejbu yennayer. Lebɣi-nsen amer a d rẓen asalu deg ara ddun tuddart niḍen, akken amuli-agi n Imaziɣen ad as-ferḥent yak tuddrin n temnaṭ Nat Jennad, wa ad yilli d yiwen wass ara yezdin imdanen ɣer yidles-nsen, amer ccan-is ad yimɣur, ad yenerni.
Deg ahil n tadwlit-agi tamezwarut, imezdaɣ n taddart n Nezla rran ad yili yiwen yimensi wuɣur ttwancaden yakk madden. Am waken nwan diɣ tamaɣra-agi ara d-yillin s demma n yennayer a d-tuɣal d tajmilt i ucennay n wawras kačču akked umeɣnas n C.M.A Mass Muhend Ḥamrani.
Iswi n tmaɣra-agi d akken ad tili d asurif amenzu i tmeɣriwin niḍen ara yesεun ttawil uggar n waya. Daymi si tura taddart n Nela tger tiɣri i yimdabren n tɣiwant akked d tidukliwin teεna tamselt akken ad d-fken afus deg uheggi n wahilen i d-iteddun. Afud amqran i yimzdaɣ n taddart n Nezla d yinelmaden-is, i d-ibedden ɣer lqdic-a yeḍfer yisaɣ!
Ait Slimane Hamid