Ass n 24 deg yennayer i d amuli wis 55 n tlalit n umeγnas agrewliw Matoub lounes. Di yakk timnaḍin n tmurt n Leqbayel wala tid n Tamazγa s lekmal-is,mmektan-d yemdanen argaz i d-yeǧǧan later ur nmeḥḥu deg wulawen-nsen. Γas εeddan 11 n yiseggasen γef tmettant-is i d-yellan s leγḍer deg wass-nni amcum (25/06/1998),imdanen d lmuḥal ttun-t ama d imeẓyanen wala imeqranen imi anza-s yezga yessawal-d i tlelli d tegmat akked tugdut,ssut-is yesergagay idurar wala ulawen ifuden tilelli. Nwala s wallen-nneγ amek axxam-is yellan di Tewrirt Musa yezga yeεmer s zziyar i d-yettasen γur-s akken ad as-slen di tsusmi akked lbaḍna. Ula d tulawin-nneγ,;aṭas seg-sent smenyafent ad ẓurent aẓekka neγ lemqam n Matoub wala lawliya-nniḍen ideg lberhan d lbaraka-nsen yeǧǧa-ten zman,imi yal amdan s lweqt-is, di lweqt ideg nella amuḍin yestitir i tuget n yizerfan,i tlelli d tugdut d tukksa n temḥeqranit. D ti i d tiktiwin i yezreε Lwennas akken lǧil ad tent-yettak i wayeḍ alama resxent iman-nsent di tmetti-nneγ yuklalen. Tizlatin-is d lewḥi i yas-d-yettasen si sfa n tewnaḍt taqbaylit,tawnaḍt i d-yettaǧǧan irgazen akked tlawin ur nkennu ara i lbaṭel. Tulawin yettẓurun Matoub di Lmulud akked Tεacurt ẓran-t acu n wazal i yesεa urgaz-a,ladγa aya nwalat mi ara bdun-t ad ttawin-t isefra d yicewwiqen i xedmen-t fell-as,d isefra n leḥzen imi tejreḥ tasa-nsent seg wasmi i tγab tfekka-s wama rruḥ-is atan gar-aneγ d lmuḥal ad yefnu. Ilmeẓyen akken daγen,mazal ttceyyixen s tezlatin-is n wuzzal i d-yettarran assirem i kra n win yellan yennuγna neγ yemmuγeben. Ilmend n umuli-ya wis 55 aṭas n leqdic i yemmugen ama di Tizi neγ di Bgayet wala di Tubiret,Lsas Matoub i iqedcen deg uxxam-is smektan-d amuli-ya s temzikniyin n tsawer d yisaragen,am wakken daγen i t-id-smektan yinelmaden n tidukla Assirem n n umezduγ asdawan « Iryaḥen » n Bgayet ». Ttiεad ar yimuliyen ara d-yasen imi Matoub yezga yedder gar-aneγ.
Mokrane Chikhi