Gar yisenfaren, di Tala Athmane, swayes i d-telha tγiwant n Tizi Wezzu di taggara-a, ad naf, axxam n yilmeẓẓyen akked unnar n ddabex uḍar. Annar-agi yella si zik, acu kan tarbaεt n US Tala Athmane ur tezmir ara ad turar timliliyin-is akked trebbuyaε-nniḍen s wudem unṣib deg unnar-a imi ur as-d-yezzi ara ṣsur, akka i d-yeqqar lqanun. Ihi, iwakken ad tefru temsalt, imḍebbren n tiddukla-a, ḍelben di tγiwant ad as-tebnu ṣsur. Xas ṣsur isellek, taluft ur tefri ara imi mazal tarbaεt n US Tala Athmane tkerru annar-nniḍen iwakken ad turar timiliyin-is. «annar-nneγ yewjed, yesεa akk ttawilat ilaqen, tusa-d tesqamut i t-yeẓran, qeblen-t (homologué), acu kan ur nezmir ara ad nelεeb deg-s mebla ma tella tεessas sγur iγallen n laman ; ihi dagi i tcudd i tikelt-nniḍen, wigi, γef wakken i d-nnan, ur zmiren ara (ur sεin ara lḥeqq) ad ilin di taddart-a, ilaq ttesriḥ daγen wissen anda ? Ayen nettṣerrif mi ara neffeγ γer berra, yugar ayen swayes tleḥhu tiddukla-a aseggas kamel. » i d-yenna yiwen gar yimḍebbren n USTA. Taluft-nniḍen, d tin i yerzan axxam n yilmeẓẓyen ; xas ulamma ur yeṣsaweḍ ara ad yawi isem-agi ‘’axxam n yilmeẓẓyen’’ imi d yiwet kan n tzeqqa. Mi d-tekker yiwet n tkebbanit ad tebnu ṣsur ara d-yezzin i uxxam-a, yeḥbes-iten yiwen umdan iwumi tefka akal-agi tγiwant n Tizi Wezzu. Nebγa ad nẓer sser n temsalt, nesteqsa yiwen n yimḍeber n tiddukla USTA, yenna-d : « d ṣṣeḥ,; akal-a tefka-as-t niqal tγiwant, acu kan di lweqt-nni tekker-d tesqamut n taddart, ur teqbil ara rray-a, tcetka γer tγiwant. Ihi syin, taγiwant tefka-as i urgaz-a akal anda-nniḍen, meḥsub tbeddel-as-t s wayeḍ,; netta mazal yeṭṭef kan deg wawal-is, di taggara yeqqar-d ṣserfeγ 35 yimelyunen γef useqεed n wakal-a, ilaq ad iyi-ten-id-rren. Tamsalt ha-tt-an gar yifassen n yimḍebbren n tγiwant, aql-aγ la nettrağu, ma d lexdma teḥbes. Tewweḍ γer ujmam, tenγel. » Sya ar ad tefru tyersi, sya ar ad d-tennulfu tayeḍ,; ilmeẓẓyen zemren ad rğun !!!
Lhocine Ourezki