Ussan-a terwi tebberwi deg yiɣerbazen. Liḥala trekkem, iselmaden ttgallan, imḍebbren rennun zzit i tmes. Wissen kan ma ad yili umcafeɛ i taluft-a ? Yal wa yeqqar-d yekka fell-i lḥif. D acu kan, ma nger tamuɣli ɣer wayen i d-yenna umedyaz:” Am win i k-yennan ad k-wwteɣ,; yerna ad ak-ggalleɣ ma tsuɣeḍ ad ccektiɣ”. Deg waggur n unbir yezrin, snat n ssandikat n yiselmaden beggsent ɣer uḥbas n lxedma. Ssawḍent rrant tibbura n yiɣerbazen azal n 20 n wussan. Imir, aneɣlaf n tterbegga yenna d akken iselmaden ad awin izerfan nsen. A rrbeḥ a tafat, ferḥen akk wid teɛna temsalt, ladɣa imawlan yugaden ɣef tarwa nsen. Lameɛna, ziɣ win iwulfen ineddi-tent, d lmuḥal ad yettu tixidas-is. Aggur inehher ɣer wayeḍ,; almi i d-banen wid n udfel. Ziɣ kullec d akellex. Segmi i d-yeffeɣ wawal ɣer tuɣlin s amennuɣ,; yeḍra-d ayen ur neẓri yakan. Iɣmisen beggnen-d acḥal ara yaɣen yiselmaden d tadrimt. Tamezwarut, d lɛib ad d-tettwabeggen tefrayt n lexlas n uxeddem deg uɣmis. Yernu, acḥal n wid i iḥebsen ɣef lxedma, tefra temsalt gar yiɛeggalen. Benbouzid, ur yerri azal i lbaḍna, yebɣa ahat ad yesker ahetwir gar yiselmaden d yimawlan n warrac. Tis-snat, mi akken llan wid yettmeslayen s yisem n lecyax, yerna yettmagar-iten uneɣlaf, acimi ur d-yeqqar ara i wigi ayen yenwa, melba ma yessexdem taɣamsa. Melba ccekk, aya ur d-yelli ara kan akka, almi yella leḥsab deffir-s. dɣa d ayen i yesserfan aṭas iselmaden yekkren s aneḥbus n lxedma, iwakken ad tefru taluft yiwet n tikkelt, ad tekfu tuzya d tunḍa.
Ass-a, anda ara iɛeddi uselmad, ssawalen-as-d ma tettwaxelsem, acḥal ara d-tawim deg waggur n meɣres, i di maggu, acḥal ara wen-d-fken ? D lɛib !
Merzouk Smail(d aselmad)