Leεmer txemmem Lila ad d-yaweḍ wass anda ara tekcem annar i tenwa d ayla n yirgazen kan ; nettat i d-yekren deg yiwet n taddart anda, di kra n yiseggasen γer deffir, taqcict ḥebbsen-tt-id γef lakul mi tewweḍ aseggas wis 6 deg ulmud amezwaru axaṭer ur ‘’ilaq ara’’ ad truḥ γer temdint ad tkemmel din leqraya-s.
Tikelt-a d lakul i d-iḥebsen Lila, meεna, si tamma-nniḍen, imawlan-is εawnen-tt ad tekcem tamdint akken ad turar ddabex uḍar γer terbaεt n JSK.
Nemlal-itt mi teteddu γer Σin Defla iwakken ad turar timlilit n teqbuct n Lezzayer, s lferḥ d ameqqran i d-terra γef yisteqsiyen-nneγ.
A.N.I : Amek tewwḍeḍ ad turareḍ γer terbeεt n JSK ?
Lila Assil : asmi i d-ḥebseγ si lakul, lliγ ttwerwiγ ciṭ. Imi iyi-twala temeddakelt-iw akken, tebγa ad iyi-tessenqes ciṭ γef wul, tenna-k ad tedduḍ γer JSK acku lliγ ḥemleγ aṭas addal s umata. Mi wwḍeγ γer JSK, abrid amezwaru ugin-iyi ; uγalen nnan-iyi-d : ‘’qqim smana yid-neγ ad nwali’’. Qqim kra n wassan kan syin ṭṭfen-iyi.
Nesεa di Lezzayer, Soraya Haddad, Hassiba Boulmerka, acu kan ulac yiwet di ddabex uḍar, ahat tessaremeḍ ad tiliḍ kem ?
(tettaḍsa…), tturareγ ddabex uḍar acku ḥemleγ-t aṭas, ttafeγ iman-iw imi dayen i bγiγ,; rnu ḥefḍeγ ayen-nniḍen s lemxalḍa n teḥdayin, ugar n 25, n yal tama n Tizi Wezzu. Ulac lxiq, ulac (l’angoisse). Anect-a kan igerrez…
D ddabex kan i d cγel-im, neγ yella wayen-nniḍen ?
Tagi daγen d taqsiṭ. Lliγ xeddmeγ lfeṭṭa γer yiwen, yal mi ara ruḥeγ ad urareγ ur ibeqqu ara, yewweḍ armi i yi-d-yenna ‘’xtir gar lxedma-m d ddabex’’, din din kan friγ-tt d rray-iw ; ihi ğğiγ axeddim-iw γef lğal n ddabex uḍar. Akka tura, yettḥewwis ad uγaleγ.
Lhocine Ourezki