Leqbayel am nutni,am yemselmen s umata sfuglen deg ass n lǧemεa iεeddan tameγra n Lmulud yellan d amuli n Nnbi fell-as taẓalit d sslam.Ccix Rabeḥ d yiwen seg wid i as-yerran tijmilt meqqren i urgaz-a n talsa.Netta,seg temnaḍt n at Weγlis,lxedma-s d limam i asen-yettẓallan i medden,meεna yettaru daγen tamedyazt s teqbaylit am wakken xeddmen lmacayex n zik n tmurt n Leqbayel i yeṭṭfen di tjaddit.
Tijmilt akk mucaεen i yas-yuγalen i Nnbi s tmedyazt,d asefru n « Lburda ».Asefru-ya aγezzfan mazal-it ar ass-a ttcewwiqen-t deg aṭas n temnaḍin ideg llan yemselmen,i t-yuran d amedyaz:Abu Ḥamed Albusayri Assenhaǧi,netta lasel-is d amaziγ i iεacen deg tmurt n Maser deg tallit tafaṭimit(lqern wis10).Ula d lexwan n tmurt n leqbayel aṭas n yisefra i uran γef Nnbi,deg-sen seknen-d s umata lewsayef yelhan i yesεa urgaz-a.Ccix Rabeḥ,;ahat ad yili d yiwen seg yineggura i yeṭṭfen deg lεada-ya n tira n yisefra s teqbaylit s yisekkilen n taεrabt(ẓer tugna). Netta yebda tira n yisefra asmi i yella d ṭṭaleb deg temεemmert,imi melmi-aya kan γer deffir,ṭṭelba n temεemrin n tmurt n Leqbayel ttarun tamedyazt s yisekkilen n taεrabt,akk-nsen cuban γer Le Zèbre n tullist n Dda Lmulud(Escales).
Deg yittafttaren i yaγ-d-yesken Ccix Rabeḥ,;nufa deg-sen nnig n εecra n yisefra i yexdem γef Nnbi,netta yessaram ad ten-yaru s tira tumrist n tmaziγt akken ad ten-id yessufeγ ad ten-γren medden.
Isefra n Ccix yeččuren d lemεani,deg-sen yettmeǧǧid lewsayef yelhan i s yettwassen wucbiḥ n Nnbi γer Leqbayel :smaḥ,;lxir,nniya,lḥana…atg.Deg yiwen n usefru yenna: »Jerrḥen-t(Nnbi) lqum-is feddxen-t,deg akken isumeḥ-asen »,yenna deg anda-nniḍen: »Yeǧǧa-yaγ-d ddin yelha,la smaḥ nekni neswaγ-it ».S umata ibeddu isefra-s s sslat γef Nnbi: »Ad selliγ a Nnbi fell-ak,a ddwa n leqlub ihelken.-Mennaγ tiγimit yid-k,ad yi-temleḍ abrid iselḥen.Win imeddḥen fell-ak yesεa,ddunit d laxxert ḍemnen ».
Ccix Rabeḥ d win i ḥemlen yemdanen s waṭas,isem-is yessaγ di tudrin imi yettfessil akken ilaq taqbaylit.Nnig n waya:yesdukel ger cyaxa d tmedyazt,netta yezga yeqqar mi ara t-id-yesteqsi yiwen: »Si Muḥend Umḥend,Ccix Muḥend Welḥusin,Lbacir Amellaḥ wi akk llan d lecyax neγ d ṭṭelba,d nutni daγen i d-yeǧǧan limarat timeqranin deg tmedyazt taqbaylit ».
Mokrane Chikh