Tiddukkla RAJ terra-d lwelha-s ɣer yiɣeblan i d-ttmagaren ilmeẓyen di tmetti. Tessaweḍ tura 24 n yiseggasen segmi tqeddec ɣef yizerfan-nsen, am wakken daɣen i d-tettheggi timliliyin gar tdukliwin-nniḍen. Ma yella d taseddawit n unebdu n tikkelt-agi, d tazrigt tis kuz. Timlilit-agi, teḍra-d di Tici, di twilayt n Bgayet. D MAM.Tour i yesnubegten 250 n yiɛeggalen i d-yusan ɣer tseddawit-agi. D iɛeggalen n 40 n tdukliwin i d-yerzan si 20 n lwilayat. Mlalen-d din gar 24 d 26 ɣuct 2017. Asentel n tseddawit unebdu n useggas-agi d « Ilmeẓyen d uttekki-nsen di tsertit ». Ahil d amerkanti, llan-t deg-s seddis n trebbuyaɛ n uselmed d usqerdec, gar-asen : Tamenzut ɣef « Ilmeẓyen d ttawil n uselmed n ttrebga s umata » i d-yesegzi Mass Ɛmer Yidir d Ɛadel Abdrezzaq. Nanna-d belli yewwi-d lḥal ɣef tnemhalt n ttrebga ad tefk ugar n ttawilat s wayes ara d-agmen ilmeẓyen tamusni. Tarbaɛt tis snat, isedda-tt Mass Naser Zekdun d Mass Abdelwahab Citer ɣef « Leḥkem n yilmeẓyen ». Netni wwin-d awal ɣef uttekki n yilmeẓyen di leqdic n tsertit d wamek ara sɛun awal deg uḍebber ɣef uzekka n tmetti. Tarbaɛt tis kraḍ n Mass Zakaria Belḥerc akked Mass Landar Benharisa i d-yewwi-d deg-s awal ɣef « Ilmeẓyen, tinigt d umuzzu ». Meslayen-d ɣef lḥif d uguren n yiminigen. Ama d wid d-yettasen neɣ d wid yettruḥun, acku tezga yir tmuɣli fell-asen. Di terbaɛt tis kuẓ, d Mass Buǧemɛa Hedwar i d-yemmeslayen ɣef « Ilmeẓyen d ttawilat usiwel ». Isqerdec-d aceqqiq i d-yellan gar ilmeẓyen d ttawilat usiwel : amaṭṭaf, tiliẓri d yeɣmisen. Tarbaɛt tis semmus, messlayen ɣef « Tmeṭṭut tazzayrit d umsawa gar-as d urgaz ». D Massa Crifa Buɛeṭṭa i d-iwwin awal ɣef uguren i d-tettmagar tmeṭṭuṭ, wamek ilaq ad s-yettunefk uzal di tmetti. Acku s izerfan-is kan i tezmer ad tefrari tmetti. Ma d tarbaɛt tis seddis ɣef « Yidles d tnekra n umdan ». D Mass Metref Ḥassan i tt-yessedan, ismekta-d azal tesɛa leqraya d yidles di tmetti, imi d netta i d lsas s wayes ara d-yekker umdan issewqam di tmetti-s. Di taggara, yal tarbaɛt beggnen-d ayen uran, smektan-d leɛyub yellan di tmetti, i wakken yal yiwen ad yekk d amḥadi i twaɣit. Di temlilit-agi, nessegza-d belli ilemẓi, ilaq ad iger afus, wa ad as-ttunefken ttawilat i wakken ad tesɛu tudert-is azal.
C. D/ Ḥ. A./S.M