D taggara n waggur n yunyu. Ismektayen ggten, yerna tezzun tasa n kra akk n win ččan wanzaren-is ɣef tmurt-a. Deg wass n 29 yunyu 1992 rran yeɛdawen n tudert talast i tudert n yiwen iwumi neqqar “le père de la Révoltution ” yeɛni d ababat n tegrawla. D amezruy ara d-icehden fell-as, imi turew-d temnaḍt n M’sila argaz ur nkennu i ddel, ur nqebbel azaglu. Yennuɣ, yettwaḥbes, yenḥaf maca yeṣber awidukan ad d-tesseɣres Lezzayer timunent-is. Yella seg yimezwura i d-yeslalen akabar yuɣalen d awḥid, mi akken yekker uhetwir di taggara n yiseggasen n 40. d acu kan, akken neqqar:” Limer yettuɣal lxir, ad yuɣal i tixsi”. Akken kan tefra tegrawla, grent-id gar wallen wid i d-yeqqimen mebɛid am wuccanen. Ufan-as tabburt, nfan-t si tmurt i d-yessukkes seg yimi n waɣzen. Yunag ɣer Lmerruk. Asmi akken tewweḍ s anda ur d-tettali, azrem-nni i d-rebban yezzi-d fell-asen, gren-as tiɣri i Tayeb El Watani. Ulamma yekkukra, maca yezwar-as rras n lmal di tmurt-a, yeqbel yuɣal-d. Akken kan yebda asekfel n temsal tiweɛranin, heggan-as-d tirza ara yeglun s ṛṛuḥ-is. Udfen-t ɣer Annaba. Din, i qemḍen tudert-is s ufus n widen akken ilaq ad ɛassen fell-as. Dinna i d-yeẓẓel afus-is i yizzayriyen, yerna yessegra-d awal:” S wacu i aɣ-zwaren leǧnas ? Yak s leqraya d tmusni !” d wa i d awal-is aneggaru uqbel ad d-yejbu Boumaârafi ad yesmir fell-as abruri n tersasin.
Ulamma yemmut, maca aṭas iwumi i yeldi allen. “Sani i tetteddu Lezzayer ?” d wa i d asteqsi i d-yefka deg udlis i d-yessufeɣ, mazal ar ass-a steqsayen yemdanen sani i tetteddu.
Setta (06) n yiseggasen mbeɛd, winna akken i s-yerran tajmilt s yiwet n tezlit i d-yesrusun leḥzen, tewweḍ-d ddala-s. Tala Bournana deg At Dwala teḥḍer i yir tiḥeddirt. Lwennas iteddun deg ubrid s axxam-is ur yerǧi ara ad t-id temmager tlafsa yesɛan sebɛa n yiqerra. Yal tama tesfurru-d rrsas. Qesden ad qemḍen lɛemr-is, heggan-d iman-nsen akken ilaq, “un vrai bataillon”. Ur yeslik ara seg yifassen n yemcumen, di lɛemr-is ḥala 42 n yiseggasen. D tallit anda tamurt n Leqbayel tettraju seg-s aṭas, imi yewwi-d abrid n tezdeg yebnan ɣef tugdut d leqder n leɛwayed. D yiwen n urgaz yessawḍen ad yejmeɛ tasa d wayen i turew, imi yexḍa i uxxam ufella d win n wadda, yebra i uzelmaḍ d uyeffus. Yugi faruq, yecna ɣef tegmat d tdukli. Ad d-nesmekti kan yiwet seg tezlatin-is tineggura anda i d-yenna:” Imeslayen-nni n umeddakkel Lhachimi, neɣ n Dda Lhocine d Seɛdi, ttakken abeḥri i turet…”
Ass-a, 12 n yiseggasen segmi iɣab fell-aneɣ, yeǧǧa-d agerruj ma nebɣa ad nḥareb fell-as yernu ad neddu di later-is iwakken ad nessuzef lḥif i izedɣen Tamurt. Am wakken yeẓra amek d wanda ara yemmet, yenna-d:
Ass-agi lliɣ, azekka wissen
Nniɣ-d ayen ẓriɣ, d wayen i ttwaliɣ
Cfut di terga ma ɣliɣ
D anza-w ara wen-d-yessiwlen.
M. Smail