Asaru “le retour des héros” i d-yeffɣen ɣer tiẓrigin Melovision, bɣan-t wid i t-id-yeskelsen ad yili d tajmilt meqqren i taddart n Sedduq-Ufella akked lecyax-is Aḥeddad d warraw-is.
Ɛumar Useɛdun, aselway n teẓrigin Melovision, yeddem rray ad d-yessufeɣ asaru s senf n documentaire ilmend n Ccix Aḥeddad d sin warraw-is. Ayen akk isemnennin deg wacḥal-aya d asaru ɣef lecyax akked taddart n Sedduq-Ufella, ayen akk yejmeɛ d lkenz ; Ɛumar, s teɣzi n 3 yiseggasen, ass-a imudd-it-id i medden d asaru-documentaire.
Asaru-documentaire yebna-d ɣef yiwen n uḍebsi DVD, neɣ ma yebɣa ḥed ad t-yaf d sin n VCD, ssuma-ines terxes ; win iɛeddan yezmer ad t-id-yaɣ. Yebḍa ɣef sin n yeḥricen : amezwaru yeṭṭef 25 ddqayeq, yeɛna areqqeɛ n uxxam n Ccix akked lebni n tqerrabt ; aḥric wis sin, yeṭṭef 55 ddqayeq, yebda s uheyyi n lecɣal, ama deg taddart gar yimezdaɣ-is, ama deg tzeqqa n tɣiwant d yemsulṭa, yuɣal ɣer Qsentina anda tejba tesqamutt n twacult n ccix akken ad sutren iɣsan n ccix Aḥeddad d mmi-s Ɛziyez seg uselway n tɣiwant. Syin d afella d abrid n tuɣalin ɣer taddart, armi d timḍelt i tikelt tis snat. Leqdic merra yemttuttel, yedhen s udiwenni s teqbaylit akked tmuzigt tamerkantit n Muḥand Buẓerzur.
Asaru-documentaire yesken-d medden akk curken deg leqdic-a am umeẓẓyan am umeqqran, am tmeṭṭut am urgaz. Akken ladɣa i t-id-yessefra Ɛumar Useɛdun : « Deg usaru-a, imdewwel (acteur) amezwaru d imezdaɣ n temnaṭ-a nneɣ. » Γef yiswi n leqdic am wa, yerra-yaɣ-d Ɛumar : « Aṭas n yeḥricen i d-yezzin i leqdic-a : amezwaru, nebɣa ad d-nmudd, i wid ur neḥdir i temḍelt, yiwen n DVD sway ara d-iẓer ayen akk yeḍran deg taddart n Sedduq-Ufella ; tis snat, leqdic-a yemmal ayen tesɛa taddart d lkenz. »
Γef leqdic ajdid i d-yettraǧun tiẓrigin, Ɛumar Useɛdun, yenna-k : « Ad d-nɛiwed i usaru-anda ara t-id-nerr alamma d 55 ddqayeq. »
Ait Ighil Mohand
Asali documentaire : [email protected]
Lweqt : 25 ddqiqa+55 ddqiqa
Ssuma : 200 idinaren.