Da deg Uqbu, anwa ur nessin zinga le fleuriste ? Anagar netta i mazal yettnaɣ d ubiṭun deg Temdint n Uqbu. Anda yufa taqwirt n wakal ini yeẓẓu-as kra n uxalaf, neɣ n tjeǧǧigt. Ḥemmlent akk medden ladɣa ilmeẓyen : ala ɣur-s i ttafetijeǧǧigin mi ara bɣun ad tent-hdun i wid akk d tid εzizen fell-asen. Azul, amek yettili Ɛmer Zinga ? Di tazwara, mreḥba s Uɣmis n Yimaziɣen ɣer tbarakt n yijeǧǧigen. Dacu ad ak-iniɣ,; ma ǧǧuǧgent tjeǧǧigin ay ẓẓiɣ,; ur tent-qliεen ara, init-as Zinga labas i yella. D acu i ak-yeǧǧan textareḍ akka leqdic am wa ? Ad ak-iniɣ tidet kan, d leḥmala i ḥemmleɣ tawennaṭ. Si zik mi lliɣ d amectuḥ ḥemmleɣ ad ẓẓuɣ tijeǧǧigin deg yibidunen. Neqceɣ tizemmrin d tneqlin, ttleqqimeɣ ixulaf, atg. Yella kra n win d-tufiḍ d amεiwen ? Deg yiseggasen n 95, lliɣ weḥdi kan. Seg 2005, tefka-yi-d afus n tallelt Martin Renaud, taselwayt n tdukla di Fransa yesseḥbibiren ɣef twennaṭ iwmi qqaren “Bagnolet fleurie”. D acu n lesnaf n yemɣan i tetteẓẓuḍ teffɣen-d akken ilaq ? Aṭas n lesnaf. Ad d-nebder kan kra : tislatin, qrenfel, lwerd bu sennan, gazon, mimosa, atg. D acu n yisenfaren ara tesɛuḍ akka ɣer zdat ? D talalit n waṭas n les club écologiques deg yiɣerbazen. Yakan, xelqeɣ-d kra, yiwen di tesnawit, wiyaḍ deg yiɣerbazen n taddart Taslent, Iɣrem, aɣerbaz Yusef Benberkan deg Leεzib. Am wakken daɣen i d-neslal nekk d kra n yemdukal yiwet n tdukla iwumi nsemma “Imdukal n twennaṭ”. D acu i asent-tselmadeḍ i warrac ? Selmadeɣ-asen di tazwara lesnaf n wakal n wuẓẓu d wamek ara teẓẓun. Am wakken, daɣen, ttwessiɣ-ten ɣef tezdeg n twennaṭ. S umata seḥmaleɣ-asen agama d wamek ara seḥbibren fell-as. D acu-t usirem n Ɛmer akka ar zdat ? Asirem-iw d anqas n ubiṭun, d tuɣalin n uzmumeg ɣer wudmawen n yimezdaɣ. Awal n taggara a Ɛmer. Ttmenniɣ imdanen ad fken azal meqqren i twennaṭ ideg ttidiren, ad tt-sizdgen, ad slemden tezdeg-nni i tarwa-nsen, am wakken i as-yenna Ayt Mengellat : « win yebɣan ad tseggem iseggem iman-is ». U, tanemmirt tameqqrant i Uɣmis n Yimaziɣen i aɣ–d-yefkan azal. Ma d win iran ad iyi-d-yaru, yaru-d : [email protected]
Yesteqsa-t Brahim Benhamouche