D anwa i d netta ? D amdan kan am wiyaḍ, iḥemmel s tira leɛyaḍ, yekreh ad iwali leɣlaḍ, ula d amcum ur t-yettxalaḍ. D menhu i d netta? D win i yezgan d idetti, yettwajreḥ sleɛyub n tmetti, yettxemmim ad d-yaf tikti, yessaram tuccḍa ad tettwasseɣti. D anwa i d netta ? D amdan i yesɛan nnif, iɣuc lbaṭṭel d lḥif, d uḥdiq ur yettcennif, sɣur-s ur d-yettas uɣilif. D menhu i d netta? D win i yeṭṭafaren sswab, ixeddem s ttawil ur yesseɣsab, ḥsut d akken yettenɛettab, maca annect-nni yekkes-it seg leḥsab. D anwa i d netta ? D amdan i ifehhmen timsal, war ma yesla i wawal, ɣef yiman-is yessen lettkal, ur yettanez i lɛedzan d facal. D menhu i d netta? D win i d-yekkren deg unadi, d amenṭag s usefru, d amḥaddi, i lasel-is yemmug d imekdi, werǧin yessehbel-it usurḍi. netta ad yeqqim d netta, mačči d sin, neɣ d tlata, ad yeqqim d yiwen, wa d akessar, wa d asawen. Netta,yesmektay-d wihin, win i aɣ-d-yeǧǧan timsirin, necfa fell-asen akkit, imedyazen-nneɣ n teqbaylit. Netta d acengu n tuffra, ayen s yeɛlem ad t-id-yini, ul-is ɣer wakken i t-yerra, yefren tadukkli d ɛinani. Ɣas yettban-d qessiḥ, daxel-is yeččur d leḥnana, ma yewwas ur yesmiḥ, teẓram i wayeḍ ur yekna. Nettad bab n lxir, iwuleftikli ɣer sdat, ɣef yiswi-s ur yettwexxir, alama dayen yefra-t. Ulamma ur yettmeslay aṭas, imeslayen deg-s ṭṭuqten, ma yessufeɣ-iten-id d rrsas, bu tḥila-nni ur as-ɛeǧben. Netta d win ɣilen yedderwec, wid ahat ur t-igezzu, abaɣur iḥerrez-as kullec, d gma-s n ungif ur t-yettɛuzzu. Ɣas ulamma yettidir ddiq, s tebɣes tizegger abrid, d awezɣi ad t-yesseḥbes uɛewwiq, mazal s lebɣi i yettsemmid. Xilla n medden i yenwan belli amedyaz d win i ixeddmen kan isefra, yettseggim tunṭiqin n yiles s yisekkilen d wawalen, ibennu-d yis-sen ifyar d tseddarin, maca annect-nni ur yelli d sseḥ. Dɣa,deg umagrad-a ɛerḍeɣ,ɣas s drus, ad d-ssisneɣ d anwa i d amedyaz aḥeqqani ɣe ftmuɣli-w, win yuklalen annuz sɣur wiyaḍ, iyessran ad tgem azal i leqdic-is, ad tettḥessem i yimeslayen-ines i d-irennun ɣefkra, i d-yesduqqusen win yeṭṭsen s tmenna, s uɣanib-is i yefren mi t-yefren. Deg uḍris-a,riɣ ad ssiwḍeɣ izen, ad d-sfehmeɣ yis-s d akken mačči d menwala ara yeqqlen d amedyaz, acku aneggaru-ya ma ur yelli amek i t-id-ssisneɣ, ur cukkeɣ yewweḍ d amedyaz.
Kaissa Khalifi.