Yessudes-d uxxam n umezgun n Bgayet d teẓrigin Tira s lemεawna n tiddukla Tafsut d usqamu n temnaḍt n La Haute Normandie n tmurt n Fransa, yiwen n wahil adelsan i yebdan seg ass n 18 deg agur n yulyu. Ahil-a ara ikemlen alamma d ass n 28 yulyu ttekkan deg-s waṭas n yinaẓuren i d-yusan seg tmurt n Fransa d wid n temdint n Bgayet, iswi-ines γef akken i aγ-d-yenna mass Brahim Tazaghart (tiẓrigin Tira), d tukci n tegnit i yinaẓuren n temnaḍt n Bgayet akken ad issinen idles n temnaḍt n La Haute Normandie, wid daγ n temnaḍt-a ad issinen idles n temnaḍt n Leqbayel, akken daγen ad mεawanen ad xedmen kra n tirmad n tẓuri lwaḥid imi taẓuri ur tesεi ara tilisa. Ger leqdicat i yemmugen, d asileγ n yilmeẓyen deg tẓuri n uṛsam akked uselmed n umezgun n uzniq, aṭas daγen n tirmad i yellan deg ahil am usileγ n yilmeẓen deg tẓuri n lfilmat yettḥerriken(films d’animation). Seg mesya arma d ass n 28 yulyu, yetturaju ad tkemmel temzikent i d-yellan deg uxxam n umezgun n Bgayet, am akken daγen ar d-tili turart deg yizenqan n temdint n Bgayet n tceqqufin n umezgun n uzniq, mačči d ayen ara yezgel yiwen, ihi faṛset tagnit rzut γer TRB akken ad tkemlem ad twalim ayen i d-yeqqimen deg ahil-a n umbadel adelsan.
Mokrane Chikhi