Ass n 17 deg yulyu d ass agreɣlan n teɣdemt « justice » (Ɣas akken Lezzayer ur testenya ara lufeq n Rome ayen i tt-yeǧǧan ur testeɛṛef ara s uxxam n cṛeɛ agreɣlan « CPI ») ; Ass n 18 deg yulyu d ass ideg ibedd Medjnoun Malik akked Chenoui Abdelhakim ɣer jjuj n Tizi Wezzu, acku sin n yimdanen-agi ttwaḥebsen seg leɛḍil i wazal n 12 n yiseggasen aya, imi bubben ɣef yiri-nsen timenɣiwt n umeɣnas Lounes Matoub, yettwaɣeḍṛen, i usmekti, ass n 25 yunyu 1998 deg temnaḍt n Leqbayel. Sin n yimdanen-a yeḥkem fell-asen cṛeɛ s 12 n yiseggasen (swaswa ayen yakan qqimen deg lḥebs si leɛḍil) deg uẓmaẓ-agi-nsen, acku ur nezmir ara ad d-nini d aẓmaẓ n uzamul Lounes Matoub, imi Lsas n Meɛtub (Fondation Matoub) s yiles n tselwayt-ines Malika Matoub, i yellan ɣer yidis n yemma-s Aldjia Matoub, d tama taɣaṛamt (partie civile) di cṛeɛ-agi, mebla ma nettu tama taɣaṛamt tis snat i yettmetilen Nadia Matoub (tameṭṭut n Lwennas) d yessetma-s, ur yeqbil ara ad d-yettunebder yisem n umeɣṛas n tallit-nneɣ Lounes Matoub deg uẓmaẓ-nni. Acaṛeɛ-a, ijmeɛ-d ddeqs n lɣaci, acku tazeqqa n cṛeɛ teččuṛ armi d ayen, maca amṛaḥ-ines d ilem, ɣas akken tella-d tiɣṛi seg yal tama, i yimezdaɣ akken ad d-asen ad ttekkin deg ugraw ara d-yilin deg umṛaḥ-nni, amzun akken d tidet Leqbayel tettun. Ma nemmeslay-d ɣef tiɣṛi-agi, ad d-nebder tin i d-yefka Umezday n Tidet ɣef Tmenɣiwt nMeɛtub Lwennas (Collectif de Vérité sur l’Assassinat de Matoub Lounes), i yellan di Facebook, ɣas akken ahat tiɣṛi-s ur tewwiḍ ara akken iwata, xerṣum ɣer yimttekkiyen-ines, ma drus nnig n 6000 d imttekki, nger tamawt uṭṭun-a (6000) yennerna s waṭas seg ass-nni n 18 yulyu ar ass-a, u mazal lxiṛ ɣer zdat.
S wakka, wissen kan ma ad d-sgunfun deg uẓekka yiɣsan n Mahmoud Khelili i yellan d abugaṭu ameqṛan, yedmen temsalt (seg yimezwura), n Medjnoun akked Chenoui, ɣef yiri-s, argaz-agi yewweḍ ɣer leɛfu ṛebbi, deg ass n 06 di meɣṛes deg useggas n 2002, ma d wid-ak (iɣsan) n Lwennas … fiḥel ma nennad, acku temsalt n cṛeɛ n tmenɣiwt-ines, tura i tebda ɣef akken i d-nnan ibugaṭuyen-ines, … neɣ wissen ahat, ur tebdi ara maḍi !
Farid Lahouari