Tarbaɛt taɣelnawt tezgel lɣerḍ tikkelt-a. Tettweḥrem si teqbuct n tmura n Tefriqt, imi lukan i terbiḥeḍ ay ul, tessaweḍ s ajmam. D acu kan win akken yettektilin, yecceḍ-as uɣerbal ɣer tama tayeffust, yenɣel awren d uclim deg yiwet n tikkelt. Acḥal d Azzayri yerǧan timlilit yecban tin n Maser, ad iwali amek tturaren yitran i s-tettzuxxu Tefriqt n Ugafa. Kecmen-d s annar am yizmawen, ffɣen seg-s am yizmawanen. Ur yelli kra i s- ara nessetḥi, imi ad d-nemmekti kan Menad mi d-yeqqar:” Teḥkim Ifriqi i”.
S tidet, yerra tameɣra d tamḍelt, urar n ddabex d tikurin – nni n zik. Wamma, amek ara yexdem ayen ara yessimsen amecwar yesɛedda deg tnefrayt ? D acu kan, akken neqqar:” mi ara dehnen aḥelqum, ad d-segmen lexsum”. Yettban, am win yeččan tid ur yeẓri, yerra kan lwelha-s ɣer Yizzayriyen. S kra n win yesnen leqwanen n waddal, yewhem deg unefray. Ur d-teḍri tedyant yecban ta deg teqbuct n tefriqt anda ffɣen tlata n yimyurar. Ula d Imasriyen ur d-iban ara fell-asen lferḥ meqqren, imi ẓran amek ddant temsal. D timsal am tigi i yeǧǧan tafriqt tegguma ad d-yali ṣṣut-is gar tmura nniḍen, ulac tin i d-yefkan udem yessefraḥen di teqbuct n ddunit. Si tama nniḍen, nettwali s kra n umdan ara ixedmen kra berra i lqanun ad yettuɛaqeb si tedrimt alamma d lḥebs. Ma d yinefrayen, ɣas tella kra n tebzert ara ixelles mi ara yessexser, maca d ayen iwumi yezmer maḍi. Lukan ad ilin isuḍaf ara yessiwḍen ula s aneḥbus, melba ccekk aṭas n lecɣal ara ibeddlen. Skud tella tsusmi, mazal kra n taggayt n yinefrayen ara yetjaren s temliliyin, ad ssexraben asirem n tmura.
Ɣer melmi ara tdum akka ?
M. Smail