Akka i ḍerrnt, akka i ferrunt ! tarbaɛt taɣelnawt n ddabex n uḍar tebra i leslaḥ, tesseknef taswin n yimelyunen n yizzayriyen yessarmen d akken ahat tikkelt-a Lezzayer ad tejbu s aḥric wis-8 di teqbuct n umaḍal. Lameɛna, negguma kan ad d-nini tidet. Amek ihi ara neḍmeɛ rrbeḥ seg wid yettɛassan iman nsen, ttkukrun ad zeḍmen ɣer zdat ! Asleɣmay, ibeggen-d di temlilit taneggarut asexdem n wul uqbel allaɣ. Mgal la Slovénie, nwala amek i yessedda timlilit, aniwi i d-yessekcem s annar. Yak imaren, d Ghazal akked Saifi iwumi yerra ccan, nwala amek i tfuk temlilit. Sdat Legliz, s tidet, uraren akken iwata, yesselɛeb wid ilaqen. Irkell Izzayriyen walan wid iwulmen, wid ara d-yawin igemmaḍ. Maca, win yuɣen tanumi yessexrab muḥal ad yeǧǧ seg tigad-is. Zdat Marikan, yerra-d Ghazal d Saifi, mi akken ilaq ad yili Boudebbouz. Yak, yenna-d Lounis deg wawal-is:” Ɣas nettaɣ-itent, negguma ad necfu.” Ihi, neḥḍer i yiwet n temlilit n terbaɛt Tazzayrit yeɛɛuqren, ur nezmir ad tessenhez tacebbakt n yexṣimen-is. Segmi tebda, nutni ttazzalen, fkan-d acu sɛan deg wadif, mebla ma ssagden Imarikanen. Ineggura-agi, s tidet, ɛerḍen mačči tikkelt neɣ snat ad rwin tamduct n temḥaddit, sswen lemṛaṛ i Halliche d yimeddukkal-is. Di tlemmast, Ziani d Yebda ur ɣfilen ara, maca ulac win akken iwumi ara ssiwḍen ddabex akken ad yaru iswi. Ters-d lehna di temḥaddit n Marikan i neẓra belli mačči d tin yeqwan, dɣa ufan abrid ɣer tama n uɛessas Mbolhi iwumi ara nerr tajmilt imi yessafarrer aṭas n tegnatin tiweɛranin. D aɛessas yuklalen amkan-is.
Ass-a, teqqim-aɣ telqimt di tḥarjuṭ. Ayadra, ad ilin wid ara isuɣen, ulamma tin yeḍran teḍra, ad d-inin basṭa i ustehzi ! Qqaren akk deg wawal:” On ne change pas l’équipe qui gagne”. Tikkelt-a tuɣal : « On ne change pas l’équipe qui perd ».
Cwiṭ neswab maḍi maḍi !
M. Smail