Qqaren zik-nni, tella-d teɛdawt gar snat n tudrin. Yiwet deg-sent tekseb argaz d ahendaz, yekkat ur yettwat. Yiwen n wass, yekker-d imenɣi, terwi tebberwi. Ttmiwwaten yimdanen, ttembarrazen am wakraren. Ahendaz-nni, yekkat, iɣeṭṭel, almi d yiwet n tikkelt ur yeẓri anisi i s-d-tekka tyita, iḥulfa-as qerriḥet. Yuɣwas, yenna-as:”Tagi ad tili d tiyita n gma.”
Am wakken i tt-yenna, ziɣ gma-s yedda-d d tama nniḍen.
Tikkelt-a, dayen i neẓra deg uxxam n uqacuc n Zighout Youcef deg tmanaɣt. Aneɣlaf amezwaru yerra-d ɣef yiseqsiyen n yisertiyen-nneɣ. Am wakken i yettwassen, Ouyahia yettmeslay, yessegdal yerna yessen ad yeḥseb. Ulac aḥric yezgel ur d-yemmeslay ara fell-as, yerna ad as-d-iḥennek s yimḍanen. Da d imelyunen, dihin d ixxamen s agemmaḍ tikebbuna d yisenfaren. Lḥasun, smuzegget, terreḍ asirem deg wul belli ad tseggem. Yurar s wawalen almi yeɛya, yetti-tt ɣer tinna akken yesseqraḥen. Yezzi-d udem-is ɣer yiwen n ukabar, yesmar-as-d iḥelfan. D abumbardi ! S kra n win akk i d-yemmeslayen ayen iɛeddan mgal akabar-agi ur t-tḍur ara tyita, lameɛna asmi i d-tekka seg win i yesnen tasga, qerriḥet. D acu kan ula d netta yerra-d almend n useqsi i s-yettunefken, imi win i s-ihedren ur icuh ara. Am wakken kra yuɣen tamurt ssebba-s d aneɣlaf amezwaru. Dɣa Ihi, amek ara tishil tririt mi akken i sen-d-yenna:” trehnem tamnaḍt deg 1994, ternam-as deg 2005. Tura telham-d d yiman-nwen.” Mebla ma nesseɣzef deg wawal, tazwara d netta i iwekkel Zeroual ad yemmeslay d terbaɛt n l’MCB deg uɣunzu n uɣerbaz. Deg tis snat, d netta i iwekkel Bouteflika ad yefru taluft n leɛruc akken i as- semman. Nezmer ad d-nini d netta i iqublen iɣeblan, ma ur frin ara, wissen aniwa i tt-icekklen. Ma yella kra n tuffirt yellan, awi yufan lukan ad d-yefḍeḥ lbazga, imdanen akk ad ẓren. Acku, ma truḥ akka, Iqbayliyen ad ttnaɣen gar-asen, wiyaḍ ad ssiksilen isenfaren, ad ssawaḍen tadrimt, nekni ad nettnaɣ ɣef yiɣsan. Ǧǧan-tt-id imezwura:” Nesserwet, ɛebban wiyaḍ”. Ma d lhem ad t-nqabel, ma d rrbeḥ llan yimawlan-is. Yak yenna-d Lwennas:” Uqbel ad tegrem asurif, xas zwert nnif”.
A. A