Yeṭṭuqet wawal deg wussan-agi γef uγerbaz alemmas ‘’Lotfi’’, yerna mačči γef wayen yelhan ! Mbeεd mi yefka unemhal-is ttesriḥat i yinelmaden akken ur ḥeddren ara timsirin n tmaziγt, tikelt-a ‘’yunef’’ i yiwet n tmeṭṭut (yemma-s n yiwen unelmad) akken ad tewwet taselmadt daxel n uγerbaz-a. Ha-t-an amek teḍra temsalt-a, εlaḥsab n wayen i aγ-d-nnan : yiwet n tselmadt tewwet anelmad-is imi yettmeslay lawan mi asen-d-tessefham tamsirt. Mi yewweḍ uqcic s axxam, yeḥka-as i yemma-s. Tayemmat mi twala liḥala n mmi-s ur teṭṭif ara deg yiman-is, truḥ akken ad tẓer taselmadt-nni. Yemzeggad wawal gar-asent : ta teqqar-as wweγ-t axater yugi ad yessusem ; tayeḍ teqqar-as ur tesεiḍ ara lḥeqq ad t-tewwteḍ yerna mačči s tyita i ttrebbayen medden dderya. Awal yettawi-d wayeḍ, temmeγ tyemmat n uqcic tewwet tanelmadt-nni u teskencew-as akk lḥiğab ines.
‘’ayen yessewhamen, d amek ttağğan yimḍebbren n yiγerbazen imawlan n yinelmaden ad ẓren iselmaden mebla ma ḥedren nutni ?’’ i aγ-tenna yiwet n tselmadt n uγerbaz-a.
D ssaḥ ur d-tettawi kra tyita ; ur yezmir ara ad yetturebbi neγ ad iγer uqcic n tura s teγrit, acukan ula d acetki s teγrit ur d-yettawi iqiḥ, ahat ! ‘’Limer d lebγi, ad εiwden iselmaden tamuγli i wamek sγarayen ; llant tarrayin n uselmed anda anelmaden ad d-yelhu kan di lxedma-s ; anda ilaq fell-as ad yemmeslay mačči kan ad yessusem.’’ Wagi i d rray n Djamila, d taselmadt ula d nettat. ‘’Llan ula d imaswaḍen i aγ-d-yeqqaren ilaq ad tesxedmem akk ttawilat iwakken ad tessusmem inelmaden, ula d tiγrit maεlic, acu, ad tessinem amek ara tewwtem. Ruḥ fhem-itt tura !’’ i yesḥassef Rabah.
Hocine. M