D tamsalt n umdan,teεna-t netta kan iman-is.D taneqqiṭ-a i d-skeflen yibugaṭuten n tmanya-nni n yilmeẓyen n Yiγẓer Ameqran,mi εeddan deg creε ass n 09 unbir s sseba n wučči n remḍan!Ass-nni,azniq n uxxam n creε n Uqbu yeččur d ilmeẓyen i d-yusan si yal tama akken ad inin ala i lbaṭel i tebγa ad texdem tγademt.Yak taneqqiṭ i d-nebder uwsawen tettwaressex deg umagrad 18 n wulγu agreγlan n yizerfan n umdan iγef tvuṭi Lezzayer!Yak tamendawt n tmurt tefka ttesriḥ i yal yiwen ad yextir taflest-ines mebla ma yella d ineslem mbessif ! U yerna tamsalt-a ur tcud ara γer tuffγa i ddin am wakken i tt-ttwalin kra,mebγir ma nmuqel γer tedyanin icuban ti i d-yeḍran anda-nniḍen(am Tbessa d Um Lebwaqi);Leqbayel seg zik-nsen akka i gan wa yeṭṭebiq tineslemt wa yettamen kan yes-s.
Yiwen seg yilmeẓyen-a yettwatehmen,wa d Chekaoui Arab,yesferh-d taluft akken ilaq mi akken i t-yesteqsa jjuj,netta yenna: »D tidet ččiγ remḍan meεna ttqadareγ lislam,imawlan-iw d imselmen ».D ayen illan i d-yenna uqcic-a,netta seg udrum n at Ccix lejdud-is akk γran leqran,seg-sen lecyax imeqranen am Taher Aweγlis d baba-s Saleḥ yunagen γer Suriya deg useggas n 1847. Tamsalt-a daγen yura fell-as yiwen seg lmacayex imeqranen n tmurt n Leqbayel yeddren di lqern wis 19,wa d Abu Yeεla Zwawi, netta yura deg udlis-is umi isemma(tarix zwawa): »Di tmetti taqbaylit ad tafeḍ irgazen ur ttẓallan ur ttẓummun lameεna d lefḥul,ttemmaten γef tidet,ttnaγen γef tneslmet ».
Ihi ulayγer turart s leεwayed n yimdanen d tfelsin-nsen,ilmeẓyen uḥwaǧen tuget n tlelli d yizerfan akken azekka ad refden tamurt.
Mokrane chikhi