A nezwar lɛid s yiwen wass ɣef iseflan di tmurt-a…Macahu ɣef wid izellun, ssazzalen idammen. Zik menwala yessuzzel-iten, ad ifek ikerri d asfel, imenneɛ si tneṭṭaḥin. Tura, leǧyub xlan xas lxedma ur ǧǧin ara. Ula d aɣrum aberkan setten d aḥerfi ur ten-id-yettṣaḥ ara. W’ara yeččen?w’ara yeqqimen? Di ṛebɛa tɣemmar n tmurt, ṛwan medden amdegger ɣef cwiṭ n lkaɣeḍ yettaɣen yeznun di leṛwaḥ! Ma yella kra n ṛṛuḥ ara d-xelfen iḥemmalen n waman yewwin azegzaw d uquran. Di yal tama iḥeml-d wasif, as-tiniḍ neṛwa lehna ala tagi I ɣ-d-yeqqimen !Lukan d lebɣi a nefṛaḥ s ugeffur, ad isew wakal, ad tili ṣṣaba, ad yeṛwu uɛebbuḍ ad yernu uqerru. Maɛna m’ara d-yaf tiregwa ur njirent ara, ixxamen n wuffal, ur iferren ara, ayen d-yufa ad yeglu yes. Ameɣbun d winna kan ara d-yafen iman-is deg webrid, la aḥbib, la lwali, yerna bac ad izdeɣ anda nniḍen, alma tḥeqqen ma d tidet tewwi-t tḥemmalt ara yawin! Zun akken terra-t tmara, ad ines I wegris, as-yini: “ɣli-d ay adrar fell-i”. Ad iṛuḥ d asfel, yiwen ur yeɛlim ur yegzi. Yerna taḥemmalt n tikelt-a ur texdim ara miḥyaf, tewwi ula d isensuyen nni nhegga i ubeṛṛani, imi ara t-id-yawi webrid ad yissin tamurt. I ysensuyen-agi, amek ten-tewwi tḥemmalt? Yak llsas iṣeḥḥa, adrim yella, ur xedmen ara yemḍebren-nnsen la chaîne, ad d-awin adrim akken ad iɛegged ubeṛṛani!Maɛna, anef i ubeṛṛani ad iṛuḥ d asfel, ad yegri ubeḥri, anda d-iṣuḍ ad aɣ-yawi!. Ula d cwiṭ n ṭṭjur-nni yeɣran, iqsed-itent-id waḍu, a tent-yawi d asfel ma ulac a neččeḥ fell-as. Yuɣ lḥal, ixxamen ara yeddermen, ṭṭjur ara yeɣlin, wid ara d-txellef tḥemmalt ara yawin, wid ara yellzen si leǧyub yexlan, wid i wumi ur zurit ara wudmawen-nnsen, ad myafen di teflukt, ad ḥerqen, ad cerrgen lebḥer, ad ilin d iseflan i wid ara yɛegden, ad zlun akraren, ad sen-sɣerten ma leḥqen ɣer tmura n medden!
Zira