Zgan yimenza-nneɣ qqaren-aɣ-d : ddunit d lakul. Nettaf imeslayen-agi deg yinzan, deg yisefra akked tezlatin : Ur sḥissif ara / Ɣas yemɣembas wul / Tagi d leqraya / Ddunit d lakul. Di lakul-agi n ddunit llant temsirin yall ass, i yall amdan, di yall taswiɛt. Timsirin n tudert ggten ɣef medden merra, maca yall yiwen amek i tent-ilemmed, yall yiwen d acu n wazal i sent-yettak. Llan widen i iceffun fell-asent, llan daɣen widen i tent-itettun. Widen iceffun teddun dima ɣer zdat, ẓran sani i la leḥḥun, tikli-nsen tesɛa iswi. Ma d widen itettun zgan tezzin tennḍen, zgan di lqaɛ n tesraft ideg ɣlin yakan geddac n tikkal war ma rran lwelha-nsen s aya.
Llant tmanya tullisin deg wammud-agi. Isental-nsent sselfen i kra n tedyanin iḍerrun dagi ɣur-neɣ, di tudert-nneɣ n yall ass. Ad tafem tayri, temẓi, tamurt… akked kra seg wayen yerzan ineɣmasen. D isental iɣef yella wawal aṭas imi d llsas n tudert di yall timetti.
Di Tuɣalin ɣer tmurt, leḥḥun ur ẓrin sani, d tikli s lewhi. Di tmurt-nsen, gar-asen i llan, tettbeddil fell-as maca anda i tt-ǧǧan i tt-mazal.
Di Nneksa neɣ d laksida, d tawaɣit i yeḍran imi ulac aḥezzeb, ulac leɛqel akked lmeɛqul. Wa yeqqar-as tagi d nneksa, wayeḍ yeqqar-as d laksida yili tawaɣit yiwet.
Di Atan wul-iw, i buddeɣ i Zimu, teffer tayri, tuggad, teqqim kan deg wulawen daxel n yidmaren, tugi ad d-teffeɣ ammer anwa i tt-yettwalin.
Di Ḥadret ccfaya, ayen yeffren seg umezruy-nneɣ, ama d aqbur ama d win n ṭṭrad n 54-62, yeǧǧa-aɣ nettwaɛelleq gar yigenni akked tmurt.
Di Uriɣ aḍris deg uɣmis, aneɣmas iɣef zzin at twacult-is imi i d-yenna ayen i ten-iḍurren deg yiwen uḍris.
Di D aseklu i d-yennan, d taggara n yilemẓi umi kksen tayri, teǧǧa-t tadukli… tefka tmurt-is deg-s afus.
Di D acu ara d-ilalen ?, xdem ayen i k-d-qqareɣ mačči aayen i xeddmeɣ ! Rray yessawaḍen ɣer tmettant.
Di tneggarut Timsirin n tudert, d taseddart iss yekfa udlis : Ɣurwat ad ken-rren a widen itettun / D asɣar iwulmen i lqanun akked lkanun / Lmal iruḥen yis-s ara t-id-rren / Mi kfan ad t-rrẓen yis-s ad sseḥmun.
Tagi d tukkist yellan di 4ème de couverture :
« Ccfaya tegguni-tt tatut, la tt-tettɛassa, anda teɣfel neɣ anda tecceḍ ad tesberber fell-as, ad tt-tɣum, ad tt-testiqqef, ad tsum lǧehd-is alamma teǧǧa-d amkan-is d ilem, dɣa ad t-teddem. Ad tefsi imiren tidet di temda n zzman, ad tezzer i lebda wa ma ẓran-tt medden ».