Anda ara yerr uqbayli ?
Amzun akken d tarzeft : urğin teqqim tmurt n Leqbayel mebla lhul ara « yessedhun » imawlan-is, ad rren ddehn nsen γur-s. Taluft n uxtaf n yimεelmen d usuter n tedrimt tedda almi ur tesεi lmeεna, acku tegget. Almi qrib ad εyun yimdanen seg leεyad γef waya, tusa-d taluft n uselway n terbaεt n yilmezyen n leqbayel. Amek ihi ur tettcebbil ara temnadt, imi tikkelt-a d JSK, yiwen seg yizamulen n tmurt n leqbayel i yettuhazen. Mebla ma nezzi γer deffir γef tedyant n tisin n MP Mazembé uqbel ttiεad d ttawilat i s-yettunefken, d wulγu-nni i d-yefγen anda yettuhaz Hannachi s uhbas n lxedma azal n 2 n yiseggasen. D ayen ur nedri uqbel ass-a, waqila akken i s-yenna Lounis : « Tsubb s anda ur d-tettali. »
Wid akken i fernen yimeγnasen n RCD, rran tiwwura i tγiwant i hekmen iwakken ad suγen γef lbaţel yettilin mgal tamurt n Leqbayel deg uhric n unegmu. Dagi, tamsalt deg-s tikerrist : wamma, γef akken i d-nnan sin seg yimdebbren n ukabar-a di tilizri BRTV, ata-n xeddmen, snernan deg watas n yihricen ama d aman, lgaz d tirisiti almi ula d leqraya ziγ d asqamu aγerfan n twilayt i yessawden almi Tizi tewwi amkan amezwaru deg yigemmad n « le bac » tlata tikkal yemsedfaren. Lhasun, εeql-itt neγ bibb-itt. S tidet, tamurt n leqbayel yerra fell-as mahyaf, maca γef lehsab n yimeslayen n sin yimdanen-a, ulac akal anda ara ttwabnun yiγerbazen, lbaţimat d yisenfar nniden. Taluft nniden, d tin yerzan rrebrab. Amek ihi, tamurt n leqbayel mazal-itt ar ass-a tettwahres, lxuf yezdeγ ixxamen. Taneggarut, d tadyant n Uγrib anda yettwanγa yiwen n yilemzi, wayed yettwaxdef. Ma d tama n Yiεekkuren, aseεdi ur yeggar ara idarren-is iwakken ad yerzu γer tezgi-nni ad imerreh. Lbumbat tterdiqent am lherraqat deg leεyudat. Ur iwulem ara ad gen yimdanen kra n usfel ahat ad ilin ssellah ara yessuzfen lhif γef yiqbayliyen ? Imi at tmurt γaben, ad ğğen amkan i at igenwan
A. A