Tawacult n tagrawla akked d yemjuhad d yimezdaɣ n tɣiwant n Timizart rrun, ass n lɛǧemɛa 26 di unbir, rwaḥ n umjahed yellan d azamul n yimenɣi mgal amnekcem arumi, Mass Ukubaɛ Muḥend, tewwi tmattent ass n lexmis d yellan defir n lɛid tameqrant. Da Muḥ akken i‑as sawalen yemddukal‑is d yeḥbiben‑is yettwasen aṭas deg lɛarc Nat Jennad akked d temnaḍin nniḍen di tmurt n Leqbayel.
Assen n ljemɛa lawan n temḍelt tereɣraɣ Suq Lḥed s yimayaten n yemdanen id yussan si yal tama akken ad refqen innig annegeru n urgaz yellan d asad ɣer axxam‑is n lebda. Da Muḥ akken ḥamlen a t‑id ddren yelmeẓyen i d‑tittɛuzn mačči d kra, yedder ddew lɛanaya n lihba i d yuggem deg unar n trad akked imenɣi akken ad tuɣal timunent i tmurt. Wid i d tisnan, ala s wawal aziden i d‑ttmeslayen fell‑as,acku am wakken id‑aɣ d yenna Mass Ukuba Ɛamiruc : « Da Muḥend yella d amdan aḥeqqi, ur nḥamel ara tamuḥeqranit akked lbeṭel. Yedder s leḥmala n tmurt akked d tuɣdimt, ul‑is ḥnin ttɣidin‑t iẓawaliyen, yella d bab n lxir, d bab n wul yettbuddun yal amdan ». Da Muḥend yeffeɣ s adrar deg useggas n 1958 d ilemẓi n 18 isaggasen kkan di lɛemer‑is. I tazwera yella d amusebl sin akkin d amjahed. Amur ameqran n yimneɣi‑ines yellad deg At Jennad akked yerfiqen‑is am Xerbi Muḥamed, Lebaz Ɛamer (d imaɣrasen) Muḥend Arezqi, Buksil Belqasem, Wassif Akli,Busmek Muḥ Belqasem,Ait Qayed Ɛali, Ɛuemer n taɛwwint,Buzal Ccayeb, Ɛarqub Taher, Tasyuft Tahar am waken akken id‑aɣ d yenna Ukuba Ɛali i‑ilan d mmis n ɛami‑s yennuɣen ula d netta ɣef timunent yernu ijereb leḥbas n irumyen azal n 27 wagguren. Ger yeḥbiben n tagrawla yettɛuzu Mass Ukuba Muḥend akken id aɣ d nnan iɛagalen n twacult‑is nezmer ad nebder Mass Buzal Ccayeb, Juwab Aḥmed ( Uccen)Muḥamed Tizi Buaɛli n Tazmalt, Hamum Aḥmed Nat Buaɛli, commandant Muḥ Waɛli n tmerzuga, Ureḥmun Lunes. Ɣef akken diɣ i‑aɣ d nnan wid i d tisnan, Da Muḥ yella iḥamel tamurt‑is mačči d kra, yedder deg irebbi n usirem‑is, yesbur leɛanay‑as am akken diɣ yella d yiwen uragaz yettagin tinigit n ẓẓur. Mmi‑s Bussad yenna: “baba iḥamel ad yemeslay ɣef trad akked irumyen,iḥamel ad yelles I kra yesɛada ugdud deg lawan‑nni n laɛatab, werǧin yezmir ad ixulef ur iḥader ara I umuli n timunent ( 5 yulyu) neɣ amuli n umenzu n unbir”. Da Muḥ tufat‑id timunent ɣer idisan N lkulunil Muḥend U Lḥaj mi wwin abrid ɣer Beccar akken ad qablen taxazabit id‑tehegga tamurt n Lmaruk deg 1963. Din i‑ yeqqim d aɛsekriw armi d 1984 yuɣeled ɣer Sibil s legrad lajudan. Imezdaɣ n tɣiwant n Tmizart I d yefkan acḥal d ameɣras ɣef timunent am lqebtan Smaɛil Qasi, Lyutna Ṣaleḥ Ait Ɣerbi, Birquc Saɛid, Mḥend U Sliman, Ait Muḥamed Saɛid, Buksil Muqran…. Akked imjuhed s wazal ‑nsen Am Arezqi taɛwint, Muḥend Lbaz d wiyaḍ, s rehba i yewwin tafaka n da Muḥend ɣer wanda ara iruḥ yal yiwen segneɣ. Lbarud d lewjuh d tiɣratin i tirufqen llan d azamul n lƐaz deg acu yedder ger lehel‑ is akked yerfiqen‑is d at tmurt‑is.
Ait Slimane Hamid