D ayen i d-iwekked uneγlaf n lecγal n baylek mass Amar Ghoul ass-nni n lexmis 25unbir,deg unejmuε amatu n nnuwab n usqamu aγerfan aγelnaw d yineγlafen n : yidles d lemεawna tγelnawt akked lecγal n baylek. D mass Kamal Bouchoucha,nnayeb n l’RND n lwilaya n Bgayet i d-yeskeflen tamsalt n usenfar n ubrid ameqran ara yeqnen snat n lwilayat :Bgayet d Tubiret i teγzi n 100km(seg tγiwant n Aḥnif arma d tamdint n Bgayet).Nnayeb-a deg usteqsi i yas-yefka i uneγlaf,yessuter deg-s ad yini melmi ara bdun lecγal n lxedma d wayen i yemmugen deg usenfar-a meqqren. Di tririt-is,mass Amar Ghoul yessefreḥ-d nnayeb d yimezdaγ n lwilaya n Bgayet s wawal-is : « Yella lmecruε », « Asenfar ad yemmag am wakken i ken-yewεed yes-s uselway n tigduda di tirza-s taneggarut γer Bgayet ».
S sseba n uεeṭṭel n tezrawin titiqniyin,lecγal n lxedma ad bdun di taggara n useggas 2011,ad kfun di taggara n useggas 2012.Ma d ayen yeεnan aγram n yimawlan n lemluk ideg ara iεeddi ubrid,ddula attan tessewjed-d lqider n 10 melyun n ddinar ilmend n waya ;wi akk d ttfasil i d-yerna uneγlaf deg awal-is.Σla ḥsab daγen n wayen d-yessefhem uneγlaf ;abrid-a ameqran ad ilint deg-s xemsa n tqenṭiyar d yiwet n tgennarit(tunnel) ara d-yezgen di tγiwant n Sidi Σic,ad tesεu ger 400 d 450 n lmitrat di teγzi.Am wakken daγen ara yesεu ubrid-a ameqran aṭas n yiberdan ucriken ara yettawin γer temnaḍin-nniḍen.
Mass Amar Ghoul,yerna yesmekta-d nnayeb s yisenfaren iqdimen i yexdem uγlif-is deg lwilaya n Bgayet,ladγa asnerni n umḍan n yiberdan iγiwanen i yewḍen γer 1000 seg useggas n 2005 armi d ass-a.Am wakken daγen i d-yemmeslay γef yisenfaren-nniḍen ara yemmagen seg mesya γer zdat deg yiberdan iγelnawen yeqnen lwilaya n Bgayet d tid i tt-id-iqerben.Wi d :Asiwseε n ubrid aγelnaw uṭṭun 26 d ubrid aγelnaw uṭṭun 12 icudden taγiwant n Σẓazga d Leqser rnu γur-s aseggem n ubrid aγelnaw uṭṭun 09 icudden taγiwant n Xerraṭa d temdint n Sṭif.Di taggara,iεawed uneγlaf yewεed s tmagit n usenfar n ubrid ameqran,deg awal-is yenna s tmaziγt : « Lmecruε ad yewqem,tanemmirt ».
Mokrane Chikhi