Lxiq yeḍleq imraren‑is ɣef yimdanen, yerra ul am uɛeqqa ger iɣuraf. Yuɣal wawal rẓag deg yimawen. Cbaḥa n yigran tugi ad tili d tamwanest i wul yeḍruren, tafsut teɛdez ad tesmir aman n talwit ɣef yixf yettlejlijen.
Ul‑iw ixaq
Amek tura ad yethenni
Yewɛer lefraq
Leḥzen‑iw yebda ass‑agi
Tanumi tettessu ɣef tasa ussu n talwit yettarran ṛṛuḥ deg yifezqi n liser. Tesrusuy amdan ɣef tseddart yessedhuyen ixf‑is, tetterra‑t yettaf lebɣi di tuǧwa n yal ass. Maca, tanumi d taɣawsa deg ur yeḥkim ḥedd. Ahat tella, ahat ulac‑itt. Mi tenquqel ttejra n tanumi, aɣilif yessentuy tuccar‑is deg wulawen n wid iɛebden tahuski. Di tegnit am ta, aktay yettessed i lmendad.
Mmektaɣ‑d d lexyal‑im
Aqli am win ijerḥen s ṛṣas
Teǧǧiḍ- iyi ctaqeɣ udem‑im
A tin i ttarguɣ yal‑ass.
Inig ɣer wussan deg tayri tuɣ amkan deg wul, xas ur yesseḥluy lejruḥ, xerṣum yettṣebbir ṛṛuḥ. Mi yejla usafer s wacu yettidir lebɣi, tidmi tettnawal isufar yettrebbin asirem:
Taɣzalt i izedɣen ul‑iw
Mazal‑iyi xaqeɣ
Lefraq, yesmendig leḥmala. Udem n tin ɛzizen yettdewwir nnig n lxaṭer, yesserzef ul, xas deg unnar n tirga, ɣer tallit deg tayri tezdew ger yifassen.
Mi bɣiɣ ad kem- ẓreɣ
Ad belɛeɣ allen‑iw
Ad kem- ttṣewwireɣ
Weḥdi di lmux‑iw.
Iraggen n wayen iɛeddan tezzin‑d alamma d amkan, ttawin‑d rriḥa n tfeswin deg yijeǧǧigen yettdewwiḥen ul, teẓẓa leḥmala, fsan, snecraḥen tiṭ, tewwi tisselbi n thuski yellan. Ixf yesfilliten i teswiɛin n umerreḥ deg luḍyat tessa leḥnana, yeṭṭef ayen i d as‑iruḥen deg lemruj d- yewwi umecwar zdat‑s:
Sekdeɣ ɣer waman
Zeddig‑it ṣṣfan
Kkaten ttɛeddin
Nekk beɛdeɣ fell‑am
Kem ur ssaram
Ur ḥetteb i wul‑im
Ziɣ xas nessaram
Ṛebbi yettɛawan
Yeǧǧa‑aɣ lebɣi
Di tebḥatin n leḥmala, yettcewwiq wul s lexyalat n wayen, iɣaben. Yesmenyaf tirza ɣer yimeḍqan n yiḍelli, deg ccihwat n yixf tturaren‑t deg yirebbi n ṭṭmeɛ‑is. Tikwal, tirga zzuzunent ugar tilawt. Anadi yettenfal si lqaɛa, yettawi ɣer yigenwan amer di later n wayen yuzlen d yitran, ṣṣifa i ccedhant wallen ad teflali:
La steqsayeɣ itran
Ma ad d- awin lexbar
Ttɛeddin wussan
Yenɣa‑yi uḥebber
Aḥebber, ɛawaz, axemmem, leɛtab n tayri ur as-yezmir umeɛcuq yennuɣnin. Tasusmi i d- yenḍen i yidisan ‑is tezreɛ lxuf deg wul‑is, tesskfel-d lemṛaṛ ideg iger lxaṭer‑is. Iḥbiden ur yelli acu i zemren ad t-xedmen i win tekbel leḥmala ddaw n yifer‑is.
Limer di tuḍneḍ
Labud ad k-nefhem
Imi di zher i tent‑tuɣeḍ
Ur yelli ara‑k nexdem
Suddent tewwura. Lḥiḍ n nneqma yergel abrid i usirem. Tisura ur din llant. Weɛren zyada n wurfan. Ticki ur yewwiḍ lebɣi ɣer lebɣi‑s ansi i yekka ṛṛuḥ ad yaf ilem yettqasem‑d di tikili‑s. lefraq, yebna‑d iɣulad n tmenqas, lawan yegla‑d s yir tisuqas. Ṣṣber mi yenfel i ṣṣber‑is, asefru yeǧǧa‑d nnuba i lfeqɛa:
Asmi ara ifak ṣṣeber-iw
Assen ad n-rzuɣ fell-am
Ad kem‑ izdaɣ waḍu n tayri-w
Ad yessenquqel ul-inem
Ad kem- zzuznen lehḍur-iw
Ad tesrifgeḍ di later-iw
Ad d-teɣliḍ gar yifassen-iw
Ad am- qqleɣ d asirem
Ait Slimane Hamid