Win yekkren ar wayeḍ ad as-yini : Ccnawi n yimaziɣen, ur d-yeqqim wara ! I lukan a neṛṛez tasusmi n yiḍ, tasusmi yerran tamurt d tamurt n lxali, xas ulamma teɛmer am taddart Kali di Timimun, di tgurarin. Ad necnu tidet zeddigen am lekfen, lekfen mellulen temlel n yiceṭṭiḍen, temlel n llebsa yeṣren ibecniwen, d wid nni icennun ahellil n tgurarin am win ibeddi am tgerrabt yesseqraben medden ɣer wid icennun, ad asen-slen akken ilaq. Ad nerzu s Axbu n Tguni zeggaɣen tezweɣ n yidammen yesswayen iẓuran n izennatiyen di Timimun… Akal azeggaɣ, agris n yiḍ, tiziri d yetran, arnu-yas at wulawen zeddigen am lekfen : Mulay TIMMI yemmlen abrid ɣer uẓar i Mulud MƐEMMERI d Racid BELLIL igan ccan i ccnawi n yizennatiyen mi akken zdint irgazen d tlawin, cennun ɣef wayen i ten-irḥan, ɣef tderra n wul, ɣef wayen yesgugumen iles akin i Wexbu n Tguni. Yal iḍ, ttemsawalen wulawen, ttemsawalen yilsawen, ttemsawalent tfekkiwin. Wa ɣer yidis n wa, ta ɣer yidis n ta alamma semden tarbaɛt ara yeččaren tiṭ n widen iḥedren deg Uxbu n tguni. Ad cnun liser, liser-nni d-yettawin at ufella ɣer tgurarin, liser d-yettawin abeṛṛani ɣer Tmurt n Lezzayer, ad yemlil d yiman-is, ad yessizdeg iɣsan-is, ad ihuzz tafekka-s, xas ur s-yehwi, imi ara isel i ccnawi n uhellil ijebbden am ddkir : At Carwin, At Kali, At Sidi Atman, At Tgurarin,artg. D tirebbuyaɛ icudden leɛlam, zwarent i yilmeẓyen iḥeffḍen s imezwura ccnawi i ten-issidiren, ccnawi n temlilit, ccnawi i asen-igan ccan gar medden, d ccnawi n liser, di zzawiyya n Lḥaǧ Belqasem…
Zira