D ayen s iγ-d-ixebber mass Boualam Chekri yellan d yiwen seg yimḍebren n tdukla Itri Adelsan di temlilit i yaγ-d-ijemεen yid-s akked mass Boualam Messouci netta daγen d aselway n Ugraw n Yimedyazen n tdukla.Deg awal-is mass Chekri yenna-d belli »γas ma tallit n ujerred i uttekki di tfaska teγli-d di teswiεt ideg d-yella unegzum n tilifun di kra n lwilayat, maca aṭas n yimedyazen i yaγ-d-yuznen isefra-nsen s ttawil n lantirnat i nessexdam s waṭas di tdukla ».Mebla ccek iqsed-d tallit ideg lεesker n tmurt γelqen aẓetta n tilifun di tlata n lwilayat :Tubiret,Bumerdas d Tizi Wezzu mi llan xeddmen rratisaj di tama n Sidi Σli Bunab.Mass Chekri yemmeslay-aγ-d daγen γef uttekki n tlawin i tessebγas tdukla, yenna: »attekki n tlawin simal yettnerna,ula d nekni nxemmem ad nexdem araz γef ddema n waya ».
Ma d mass Boualam Messouci netta yemmeslay-aγ-d γef yiswi agejdan n temlilit-a iγef yenna »di temliliyin yecban ti nεerreḍ nettwellih imdanen γer ubrid iseḥḥan yellan d tira,ayen akk-nniḍen d lfulklur ».Am wakken daγen i yaγ-d-yessefhem belli timliliyin-a ttakent tagnit i wid yeffren seg yimedyazen ifazen akken ad d-binen ad ten-isinen medden.
M.C