Asqamu Unnig n Timmuzɣa yekfa ahil-is n useggas n 2010 s yiwet n tannant n usileɣ n yiselmaden n tmaziɣt i d-tessewjed di Bordj Bou Arréridj ussan n 27, 28 deg dujember yezrin. Timlilit-a tella-d s ufus n lemɛawna n lwali n twilayt-a ur nestehza ara iwakken ad d-yerr deg ufus n yimḍebbren n HCA ttawilat iwulmen iwakken ad d-teḍru tannant deg tignatin igerzen.Uqbel ad d-yili beddu n lecɣal n tannant, mlalen-d akk yiselmaden akked d yimḍebbren deg uxxam n yidles Aicha Haddad n temnaḍt-agi. Din, lwali n Bordj Bou Arréridj ibeggen-d d akken yewjed ad d-yefk afus n tallelt i usnerni n tutlayt-a di lwilaya anda yettḍebbir,am wakken i d-yenna belli ad d-tili tulya n tebbura n snat n tesmilin i uselmed n tmaziɣt deg B.B.A. Si tama-s, M.Merahi, amaray amatu n Usqamu Unnig n Timmuzɣa, yesḥassef s uwexxer n uselmed n tmaziɣt, win akken yellan deg useggas n 1995 iḥuza 16 n twilayin, imi yuɣal ass-a ɣer 09 kan.Mi kfan ameslay yimḍebbren-a, ruḥen yiselmaden ɣer uɣerbaz n lḥirfat n twilayt-a iwakken ad bdun lecɣal nsen. Deg wass amenzu, d M.Makhnache, yiwen n uselmad di tesdawit n Biskra i d-yewwin awal ɣef uselmed n tutlayt sumata. S yin, yezzi wawal ɣef uselmed n uḍris n tsekla deg tmaziɣt. asenfar-a, d win i d-tessewjed Nadia Berdous, yiwet n tselmadt di tesdawit n Tibiret. Nettat, Foughali akked Kemkem sqerdcent awal s telqayt akked yiselmaden ɣet temsalt n uselmed n tsekla s tmaziɣt. d ayen i yessawḍen s axeddim n trebbaɛ, imi ttwaheggan yakan kra n yiḍrisen iɣef ara yili leqdic.Ɣer taggara n wass, d yiwen n usarag i d-yellan ɣef wazal n tsekla deg useḥbiber ɣef tutlayt. D yiwen n usentel i ijebden lwelha n yiselmaden, d ayen i ten-yeǧǧan ssaɣezfan awal, imi tuget deg-sen cudden taluft ɣer wayen ttidiren deg unnar, d ayen yessawḍen ɣer ubeddel n tikta gar temnaḍin, imi wid yellan di tannant-agi usan-d seg twilayin yemxallafen.Deg wass wis-sin, d sin n yiselmaden isdawiyen, i d-yewwin sin n yisaragen ɣef yiwen n usentel yerzan timlilit. Wagi, d azal n yidles deg tsekla. Imi, isdawiyen-a mmeslayen-d sumata ɣef usentel, yezzi wawal beddemma ɣef wazal n yidles deg tsekla tamaziɣt.D askasi s telqayt i d-yellan, yal aselmad yeka-d rray-is amek i yettidir liḥala-agi di temnaḍt-is. D ayen yeṭṭfen akud ɣezzifen deg temlilit-a. Dɣa, bḍan gar-asen d tirebbaɛ iwakken ad d-ssuksen seg yiḍrisen yellan gar yifassen nsen aḥric-a n yidles daxel n tsekla. D tagnit anda i d-yettwabeggen wazal n tira deg usnerni n tmusniwin.Tannant-agi d tagnit daɣ i Usqmu Unnig n Timmuzɣa iwakken ad d-yessemlil yiwet n terbaɛt n yisdawiyen i yettekkin deg temlilit i d-yellan di Boumerdès ussan n 21, 22 d 23 ctember yezrin ɣef tira n tmaziɣt. Isdawiyen-a, gar-asen Meksem, Tidjet, Amaoui, Haddad d wiyiḍ, ttunecden-d iwakken ad arun lewṣayat i d-yeffɣen di temlilit-a n Boumerdès iwakken ad ilint d iwellihen gar yifassen n yiselmaden n tmaziɣt.Kra akk n yiselmaden i d-nemmuger ssaramen ad d-ilint temliliyin yecban tigi, d ayen ara sen-yefken afud ad slemden tamaziɣt akken iwata.
Sylia. M