Tidukliwin n yeḥricen yemgaraden am yidles, addal d tewennaḍt d tid i-d yesfaydin s yiwet n lemɛawna s lqidar n 36 500 000.00 n yidinaren deg tedrimrt tamenzut neɣ « le budget primitif » n twilayt n Tizi Wezzu. Tidukliwin n waddal d tid iwumi tettunefk tedrimt s wazal n 25 000 000.00 n yidinaren, tidukliwin tidelsanin s wazal n 9 000 000.00 n yidinaren, ma d tid n uḥareb ɣef tewennaḍt, nitenti wwint azal n 2 500 000.00 n yidinaren. Ad nerr lwelha belli tidukliwin n ddin ur asen-ttunefk ara kra n lemɛawna. Ulamma tadrimt-a d tin ara yefken afud i tdukliwin iwakken ad qedcent deg unnar, maca atta-n tezgel tid n ddin ɣas akken ula d nutenti ḥwaǧent allalen d tedrimt meqren i leqdic nsent.
Iwulem ad d-nini d akken leqdic n tdukliwin yenɣes s waṭas deg unnar ladɣa di temnaḍin yeffɣen I temdint n Tizi Ouzou. Imḍebbren nsent, di yal tagnit, ggarent tiɣri I ufus n lemɛawna. Zgan ssuturen-d allalen d ttawilat labeɛda tadrimt iwakken ad sseddun ahilen nsen, win akken ara yilin d lmendad I yilmeẓyen iwakken ur tezzin ara tama n yir ubrid.
D.Imgaline
Tawilayt ur tettɛawan ara timɣriwin n tẓerbit d tin n talaɣt.
Tamɣra n talaɣt d tin n tẓerbit i yellan yakan sfaydayent yal aseggas s lemɛawna n lqidar n xemsin n yimelyunen n ssentim i yal yiwet seg tedrimt n twilayt n Tizi wezzu, ur tent-id-iṣaḥ ara waya aseggas-a. Segmi tineggura-a uɣalent d tifaskiwin tidelsanin deg useggas yezrin, imḍebbren n twilayt gezmen-tt di rray d akken ur d-ttakken ara tadrimt imi tura leqdic yecban wa yekcem deg uḥric n tneɣlaft n yidles. Ad d-nesmekti belli tameɣra n tẓerbit i d -tettheggi yal aseggas tiddukla tadelsant Tiliwa deg taddart n At Hicem d tin n talaɣt i d- yettilin yal aseggas deg Lemɛatqa d tid i yerwan lmerta deg unadi n tedrimt i leqdic nsent. D ayen i tent-yeǧǧan ḥebsent acḥal d aseggas. Si tama nniḍen, ad nerr lwelha belli tettuhegga-d tadrimt s-ɣur twilayt s lqidar n 50 n yimelyunen n ssentim ilemend n tmeɣriwin nniḍen, yecban tin n lfeṭṭa deg At Yanni, tin n zeɛrur deg Larebɛa Nat Yiraten, tin n tbexsist deg Ilula Umalu, tin n seksu deg Friqat, tin n uzenmur deg Ifiɣa d tin n leqdic n temeṭṭut n taddart n Timizar.
D.I