Ass n lexmis yezrin, kkren yimceddalen am yiwen n urgaz ɣer yiwet n tmesbanit tameqrant i d-yesnejmaɛen azal n 10 000 n yimdanen. Tikli-agi iɣer d-ttekkin yimezdaɣ n Raffour, Imellaḥen, At yeɛla d wiyiḍ tella-d mbeɛd mi yettwaxfeḍ yiwen n yilemẓi n 35 n yiseggasen di lɛemr-is. Ḥmanache Toufik, imi d netta i yettwacleqfen ass n 06 deg waggur ideg i nella lewhi n 21h si sdat n uxxam-is, iruḥ ur d-iban anda yerra wala aniwi i t-yewwin. Ɣas takerrust-is ufan-tt tasebḥit-nni tama n La Crête-Rouge, ma d netta ur d-iban fell-as lexbar, ur d-ssawlen wid i t-yewwin ahat amer ad d-ssutren tadrimt akken i teḍra d wiyiḍ anda nniḍen. Ihi, d taluft ur neǧǧi ara Imceddalen deg lɣerḍ-nsen, imi ur ḥbisen ara s tikli d unadi anda ara yafen mmi-tsen. Simmal ttɛeddin wussan, simmal yettnerni ugraw n wid yeḥsan sani i tetteddu temsalt. Dɣa, d tagnit i d-yeslalen yiwet n tseqqamut n lḥers ara yettkelfen s unadi ɣef yilemẓi-agi. Ihi, d tiɣri ɣer yiwet n tikli i s-id-yeffeɣ unejmuɛ aneggaru n ugraw-agi. Deg wass n ssuq, yiwen seg yiɛeggalen n tseqqamut-a iberreḥ-d i yimdanen s rray-agi. Dɣa, mebla axemmam d uwexxer, ddan yimdanen deg wawal n tseqqamut, rran-d i teɣri, lḥan, suɣen yerna ɛegnen : Ad d-tili tuɣalin n Tufiq mebla ccerṭ !
Deg lawan i ruḥen yiɛeggalen n ugraw-agi ad mlilen iwakken ad ktazlen ayen yettwaxedmen deg wass, yennulfa-d lexbar yessefraḥen. Ssawlen-d wid yewwin Tufiq, iwakken ad t-mmagren yimawlan-is ad t-id-awin s axxam. Dɣa gguǧen yimdanen, ruḥen ad qablen win akken yettwarehnen azal n sebɛa wussan.
Yak yenna Lwennas deg wawal-is : « Ma nnan-ak d acu i d tafat, ini-asen d iɣallen yeddukklen. » Ihi, d wa i refden yimceddalen d amedya, yerna wwḍen ɣer lebɣi-nsen.
Akka i d lsas n tegmat, d wa i d abrid yessufuɣen.
Sylia. M