Yeɛya deg yiman-is, ulac tawwurt, anida tt-yerra teɛkes. Temẓi tettɛeddi am waḍu. Anta tin ur ijeṛṛeb ilemẓi-nni ?
tikliwin, tinekriwin, tigrawliwin ; am tid n weblaḍ, am tid n tmes, am tid n tira, am tid n yiles, yiwet ur as-tečči ! Yali mi ara yeɛreḍ ad yebded, ad yeɣli, deg uneɣluy llant ccfawat. Ccfawat n tezyiwin-is yečča rrṣaṣ, ccfawat n tezyiwin-is yečča lebḥer. Imi ara yellez, yettcerrig lebḥer, yettnadi tawwurt. Tiwwwura n useggas, ttif ilindi aseggas-a ! D imeyyaten mɛuqqen-d ddel, mɛuqqen-d tamḥeqranit, mɛuqqen-d rrif-nni i ten-iggunin, werǧin mmugren tafsut. Xaḍen yimawen. D imeyyaten iḍegger-iten lebḥer akin i tlisa n tmurt, wa yeslek, wa yečča-t lḥut, wa yezzi-d ar tmurt, s tmara, ad t-yečč lḥebs… Zik smenyafen a ten-yečč lḥut wala a ten-yečč lḥebs, tura menyif a ten-tečč tmes wala a ten-ččen leḥbas. Din i tuḍen icc-is! Ur kkat a gma ineṭṭeḍ ! Tugi a sen-tebru yir lmut. Imi tellez tiṭ seg wayen tettwali, imi tettuɛetteb terwiḥt, ala d ajajiḥ n tmes i d tawwurt. Aksum, iɣes, idammen, kra din ad yuɣal d iɣiɣden. Iɣed-nni a t-yeddem waḍu, yal tama as-yefk leḥq-is, akken kan ara d-mɣint tegrawliwin n lyasmin …
Zira