Tudi kan teqqim akken, di tmurt n lqil uqal. Nniɣ-ak tenniḍ-iyi, medden ak la d-qqaren. Qqaren-d winna akken yessaɣen am wedfel, di tmurt n at wadda d wat ufella, yewweḍ-d wass ad yeǧǧ amkan i wid i t-yifen, ad d-ilint tefranin, uqbel lawan, mafaɣ ad ččen medden nnɛi-s, ur d-iḥdir wass-is ! dɣa ma yṛuḥ, i wayen akken yebda wara t-ikemmlen ? Igzer-itt kan yeǧǧa-tt akken, a tt-yeḥku cceṭ i tɣalaṭ. Qqaren-d, win akken ɣef yettkel, yessuksas-id, seg waken t-iḥemmel, yerra-t di rrif, akken asmi ara teṭṭerdeq, ur tgellu ara s uqerruy-is. Nnan-d, ineɣmasen, ad ten-xellṣen akken ilaq, ayen ak nɛettaben, ayen ak ijeggḥen tudert-nnsen, leḥbas-nni ttaččaren, ilesawen yeggugmen, kulec ad t-ttun, ad lhin d yiman-nnsen, ad lhin d ccɣel-nnsen, kullec ad iwenneɛ. Ixeddamen, akken ma llan, kra ttalasen i ddula d idrimen, a ten-id-yuɣal, ad ččaren wurawen ad rnun ikufan, ma ufan tadrimt di lbusṭa, ar ass-a mazal ttemqellaɛen ɣef cwiṭ-nni n yedrimen d-ḥellan s tidi-nnsen. Nnan-d, leqraya, as-gen ccan, maci ɛebbi kan I wegrud meskin, ad yezzuɣur deg uqrab-is, almi yesseḥlelli-t yiwwas, ad yeglu ula s temẓi-s! ilmeẓyen, tafat uzekka, nnan-d a sen-gen leqrar, yak ulac am leqrar, ur ttilin d lexlaxel, ur ttcerrigen lebḥur s teflukin, ur ttaken times I ṣṣura-nnsen: lxedma, tamezduɣt, ulac win ara ten-yifen…
Imi akken ma llan ara d-qqaren, amer ahat aɣ-d-inin amek ara yili uzekka, di tmurt n at wadda d wat ufella? tenteḥ di yal tamurt, nekni nelha-d di lqil uqal, nzerreɛ awal, d ayen kan I ɣ-id-iqqimen…
Zira