Sliman Σazem d yiwet n tgejdit gar tgejda n ccna n teqbaylit, ilul ass n 19 Cṭumber 1918 deg Ugni Ggeγran, taγiwant n Yiwaḍiyen deg Tizi Wezzu, ass mi yewweḍ 6 n yiseggasen deg tudert-is, yekcem s aγerbaz n taddart-is, din-a i tebda tettbin-d tayri n Dda Sliman i tmedyezt, imi yelmed akk isefra n Jean de la Fontaine, yella diγen yiwen n umedyaz-nniḍen umi qqaren Si Muḥend u Mḥend, wa iḥuza-t aṭas, dγa yettader-it deg waṭas n tezlatin-is. Ḥekkun-d diγen yiwet n teqsiṭ γef Dda Sliman, qqaren-d d akken yiwen n wass deg lexla, ibed-d γur-s yiwen n umγar, yenna-yas : iniyi-d, tebγiḍ ad iεmer Rebbi aqerruy-ik naγ axxam-ik ? yerra-yas Dda Sliman : bγiγ ad yeεmer Rebbi aqerruy-iw. Anect-a yuγal d tilawt, acku yemmut ur d-yeǧǧi wara dderya, maca yeǧǧa-d isefra, d isefra n yiḍelli d wass-a, d isefra n yal tasuta. Dda Sliman iḥemmel aṭas tamurt-is, dγa ur iεeṭṭel ara yekcem deg tsertit n ukabar n PPA d MTLD almi d aseggas n 1937 yufa iman-is izmer i lγerba dγa icerreg lebḥer, iruḥ γar Fransa, deg tudert-is anagar 19 n yiseggasen. Deg ṭṭrad amaḍlan wis sin, ṭṭfent yilalmaniyen, ḥebsent 3 n yiseggasen, almi d aseggas n 1945. Deg useggas n 1948 yessufeγ-d tizlit tamezwarut umi isemma « A Muḥ a Muḥ », Deg useggas n 1956, issufeγ-d tizlit umi yeqqar « Ffeγ ay ajrad tamurt-iw », tizlit-a texdem axessar deg wallaγ n umnekcam arumi ; yecna lγerba, tagrawla, timetti, taqbaylit d yidles, yecna diγen tayri « Aṭas i sebreγ », « Kem akk d nek » netta d Bahiya Faraḥ ; deg useggas n 1970 yettunefk-as waraz n uḍebsi n wureγ d tajmilt γef wayen akk i yeqdec d wayen i yeεteb ama γef yidles ama γef tmurt. Dda Slima Σazem yedder d aγrib, yemmut d aγrib, imi yessaweḍ leεfu n Rebbi ass n 28 deg wayyur n yennayer 1983, yemḍel deg tmeqbert n Moissac deg tmurt n Fransa, mac axas yemmut, awal-is mazal-it yedder deg wallaγ n yal yiwen d yiwet i icennun tizlatin-is, acku Dda Sliman ur yelli wara kan d anaẓur, maca d amusnaw, d ccix n lecyax, tizlatin-is ttwessint γef tegmat, γef teqbaylit, γef yiseγ d tjaddit, ass-a tajmilt i nezmer ad tt-nerr i unaẓur-a ameqqran, d asmuzget i tezlatin-is, acku yal tizlit d tamsirt, daymi i as-yenna unaẓur ameqqran Kamal Ḥemmadi deg tezwert n tezlit Taqbaylit n Dda Sliman: « seg wasmi i as-nesla yecna, i aγ-yeεǧeb leγna nḥemmel-it, awal-is akk d lmeεna, yemmal abrid neḍfer-it, s lqima-s wayen i d-yenna, yerna ccbaḥa i teqbaylit ». Ihi ad yerḥem Rebbi akk lecyax yemmuten, wid i d-yeǧǧan lemtul d lmeεna, ǧǧan-d awal i iweznen, d lfen εzizen, γlay ur yesεi ssuma.
Lεarbi YAḤYUN