Times d isɣaren imi ara ten-id-tzedmeḍ, times d isɣaren imi ara ḥeḍmen. Times d zzalamiṭ d lkaɣeḍ imi ara d-mlilen, Ajajiḥ n tmes d ulawen yewwan, d ulawen yekwan, d ulawen ɣ-yeččan ɣef liḥala ɣ-yenɣan. Liḥala n tmurt, d asif I ɣ-yeččan, d asif ɣ-yewwin d asawen,asif d aman, aman iluɣen s lekdeb imzenneq, aman iluɣen s idammen imectuḥen, aman iluɣen s ifassen n imeɛfan…times d nekni icuban isufa ireqqen yettaẓen.Times d nekni iḥemmlen azaylal imi akken ara qqnent wallen d ayenni, nḥemmel-it yessidiraɣ s tmara xas akken ifadden kkawen, nḥemmel-it yemmalaɣ abrid s tsusmi ineqqen lebɣi n tudert, lebɣi n tilin nneɣ di tlelli; nḥemmel-it ineqq lbenna n wussan d wuḍan. Times d ayen akken I ɣ-yeggunin imi akka I d-iṣuḍ waḍu n tegrawliwin d nekni nessikid kan ɣer wayen icekklen ifassen-nneɣ, ɣer yimawen-nneɣ cebbḥent tekmamin acḥal d iseggasen-aya, nettu belli ma tessusmeḍ ad temteḍ, ma temmeslayeḍ-d ad temteḍ, meqqar ini-d temmteḍ. Times d iḍarren-nneɣ icekklen di tizi n tikliwin d tnekriwin am waken ur numin ara ad tbeddel fell-aɣ, yak ad tbeddel neɣ ad tt-nbeddel, maɛna amek ara tt-nbeddel ma nessikid di ṣṣura-nneɣ treq? Amek ara tt-nbeddel ma nɛemmed ad kfun, ṛṛuḥ-nneɣ la tt-ttɛettiben s lxuf d tugdi, ur iban wissen d acu? Times ma nessaked ɣer zdat anda akken i ɣ-d-iqubel umennuɣ, a neɛfes tirgin ḥafi, ass-n ad d-nendekwal, ad d-nedduqqes, aɣ-iban I nebɣa, aɣ-d-iban wi ɣ-yeggunin…
zira