S umeslay, ur neǧǧi kra, nessenqad i kra iteddun ɣef tmurt. Ayadra, ma yella wacu i nexdem iwakken ad nesseḥbiber ɣef twennaḍt ? Tiririt ur tewɛir, ur telli d tuffirt. Lukan kan ad nerzu ɣer yimukan n tmerrit, ad nwali anda tedda taluft. Ur nessebɛad ara nnig n Tikjda. Win ara yerzun ɣer din, ad d-yerr ul-is d amejruḥ. Amek ur treffuḍ ara, mi ara tettedduḍ, iri n ubrid yedmek s teqreɛtin. S kra n win ara yeččen, ad yebru i yiḍumman di lqaɛa, almi ula d iqecran n lyajur d lǧir ttwaḍegren di tlemmast n teẓgi. Lḥasun, ulac win ara iḥunen ɣef umkan-a, wa iɛemmed, wa yessusem. Aseggas yezrin, kkren kra n warrac imeẓyanen n taddart n Semmache, wid iqeddcen di tiddukla “Tafat” berzen akk abrid. Jemɛen-d nnig n 100 n tcekkarin n teqreɛtin. Necden-d taɣiwant n Lesnam, i d-yefkan afus n lemɛawna s ujmaɛ n tcekkarin-nni. S tidet, beddlen-as udem i Tikjda, tban-d tecbeḥ d ayen kan. D acu kan, kra n wussan mbeɛd, yuɣal wasif ɣer lḥed-is, amzun akken ur ɛeddan warrac s-yin. Ad d-tiniḍ d ttar i d-rran wid yessemsaxen. Tenneqlab teswiɛt, yeqqel uqelmun s iḍarren: Arrac ad ssizdigen, imeqranen ad ssemsaxen ! Ma nezzi-d ɣer temdinin, ad inezzeh win ixaqen, akken i neqqar. Ticekkarin ttuzzurent deg yizenqan, ad as-tiniḍ imdanen-a ma ur walan ara lewsex ur ttidiren ara di talwit. Kra n tseɛtin kan segmi ara ɛeddin ixeddamen yessizdigen, kullec ad d-yuɣal akken yella. Ass-a, yal yiwen ihedder ɣef liḥala-agi, ur t-ɛǧib ula yiwen, maca aniwa ara d-ineṭqen. Tezdeg ur teqqim ara deg umeslay, maca di lefɛayel. Akken i s-yenna umedyaz: “Win yebɣan ad t-tseggem, yezwir iseggem iman-is.”
M. S