Iɣallen n laman ḥuzan-d deg ucebbak nsen di taggara n yimalas yezrin 5 n yirebraben iwumi rran talast n leqdic. Taggara n wass n larebɛa iɛeddan, deg umkan iwumi qqaren Asammar i d-yezgan deg ubrid yettawin ɣer Tikjda, 3 n yirebraben i yettwanɣan mi akken i d-fɣen s abrid iwakken ad kksen i yiwen n yilemẓi takerrust-is. Iserdasen yeffren dinna fɣen-d ɣur-sen, qemḍen tirwiḥin nsen. Imesḥaf-agi d wid yefɣen ɣer umadaɣ azal n 3 n yiseggasen aya, sin gar-asen ttwasnen di temnaḍt n Leɛǧiba d M’chedallah.
Deg yiḍ n lǧemɛa iɛeddan, iɣallen-agi n laman kemmlen anadi ɣef yiɛeggalen n tarbaɛt-agi. Imi leɛtab nsen ur iruḥ ara d asfel, ssawḍen ad nɣen sin n yirebraben nniḍen.
Ad nesmekti d akken deg wagguren ineggura-agi, yeɣli-d lxuf di temnaḍin anda tezzin yiminigen-agi. Seg Haizer alamma d M’chedallah, tɛeddiḍ ɣef La Crête-Rouge, yal mi ara d-yeɣli yiḍ, imdanen ttgaman ad fɣen ɣer berra. Ula d imawlan n tḥuna d leqhawi ttarran tibbura ɣef zik, ttḥaraben ɣef rrezq nsen, amar ad d-jbun wid ara t-yawin.
S. M