Acḥal d aseggas segmi i ttrajun yimezdaɣ n tɣiwant n Leɛǧiba asenfar n lebni n yiwet n tqenṭert ara yesdukklen gar temnaḍin-is. Imi, laẓ yeweɛduyen ur ineqq, ata-n asirem nsen ad yessiweḍ. Deg wussan-a yezrin, teffeɣ-d yiwet n tseqqamut n twilayt n Tubiret, terza ɣer umkan anda ara tettwabnu tqenṭert-a. D asenfar melba ccekk ara d-yefken afus i uftay n temnaḍin akk i d-yezzin i Leɛǧiba, imi d win ara yezḍen gar waṭas n tudrin alamma dduklent s abrid ameqran Asammar-Amalu. Ɣef wakken i nesla, tettunefk-d tedrimt s wazal i usenfar-a ara yawḍen ɣer 12 n yimelyaren n ssantim. Iwulem ahat ad d-nesmekti d akken seg useggas n 2003 segmi i teɣli yiwet n tqenṭert tameẓyant n uḍar, imezdaɣ n Hagui akked Semmache rezzun-d ɣer Leɛǧiba mi akken ara ḥwiǧen lekwaɣeḍ si tɣiwant. Ur zmiren ara ad d-ttezzin s wazal n 10 ikilumitren iwakken ad awḍen. Di tirza n lwali yellan lawan-nni ɣer temnaḍt-a deg useggas n 2004, iwala liḥala amek tella, dɣa iṛeggem d akken ad d-yelhu s taluft-a. Am akken qqaren, rǧu ay Aɛrab ar tafsut, aseggas yettak-itt i wayeḍ, almi d tura i d-yusa lawan-is.
Isallen I d-newwi s-ɣur lmir n tɣiwant-a, tiqenṭert-a d tin iɣef ara zegrent tkeryas d yikamyunen d ayen ara yeldin tiwwura n lxedman d tjara gar temnaḍin I merra alamma nejba ula ɣer twilayt n Tizi Ouzou, imi abrid ara yeldin gar wasif asemmaḍ d taddart n Yilyiten ad yessufeɣ srid ɣer ubrid aɣelnaw wis-30.
Skud imḍebbren fettin-d taxriṭ, asirem n yimezdaɣ n tɣiwant-a ssaramen d ayen ara d-yeglun s yisenfaren-nniḍen ara yessuzfen lḥif ɣef yimdanen.
S. M