Imawlan n yedles d yimezdaγ n temnaḍt n Wizgan, heggan-d yiwen n leqdic s wazal-is i wass n 16 yebrir 2011 swayes ar d-rren tajmilt i mass Cherif Messaoudène, anemhal n wexxam n yedles Ferrat Remdane n temnaḍt n Wizgan Lwilaya n Tizi-Wezzu, u d saselway n tiddukla tadelsant Igelfan n temnaḍt-agi, i tewwi tmettant ass n 18 yebrir 2010, azemz (Date) n umuli n tefsut tabberkant, tamḍelt-is tella-d ass n tefsut n yimaziγen (20 yebrir 2010)n acku d aneγmas n tmaziγt d tugdut seg ul.
Γas akken Cherif Messaoudène icewwel-it waṭan, maca yesεa tabγest swayes yeqqubel tagnitt.Imezdaγ n Wizgan ar ass-a cffan merra γef ayen id-yefka wergaz-agi i yedles, γef taftilt n yedles i yecεel . yefka tudert-is ilfayda n yedles amazi&gamma,; 44 issegasen deg laεmer-is mazal ur yezzwij-ara, yal tikkelt yeqqar “nekk zzewjaγ d yedles”. D netta i d-yewwin γer wexxam n yedles Ferrat Remdane n Wizgan Irgazen imusnawen, imawlan n yedles d tẓuri, ger-asen llan : Ben Mohamed, d amedyaz, Daho Djerbal, d amnazray u d anemhal n tesγunt NAQD, Habiba Djahnine, cinéaste u d tamedyazt, Youcef Merahi, d amedyaz, u daselway n wesqqamu unnig n timuzγa HCA, Ali Feraoun, Mmi-s n wemyaru Mouloud Feraoun, Abderrahmane Bouguermouh, , Belkacem Mostefaoui, Louiza Ighil Ahriz, d tamjahedt u d-tamyarutt, , Amine Zaoui, d amyaru, Rachid Boudjedra, d amyaru, Maissa Bey d wiyaḍ merra id-yussan γer Wizgan.I tama niḍen Cherif yeslul-d yiwet n tesγunt »Echos de Bouzeguene » fγent-d deg-s 9 n wuṭṭunen, rrnu γef waya, Cherif Messaoudène yeldi yiwet n temkarḍit deg wexxam n yedles n Wizgan. Cherif d taεewwint n yedles anda i yugmen aṭas n yemdanen, taxalaf leqqaqen, γas yemmut imγan-is mazal meqqin, mazal-it yedder deg ulawen-nneγ ilebda.
Islam Bessaci