Deg ussan iεeddan, deg waggur-agi dγa n yebrir, axxam n yizerfan n umdan d uγerfan (Maison des Droits de l’Homme et du Citoyen) n Tizi Wezzu ihegga-d yiwet n temlilit i yineγmasen. Di temlilit-a, yella-d wawal γef tlelli n umeslay d leqwanen yerzan aḥric-agi n tγamsa. Ar da, ur yelli d acu yessewhamen ! Acu kan winna i d-ceyyεen si Lezzayer tamaneγt akken ad d-yehder γef tlelli n umeslay d yizerfan n umdan, Mass BENHENNI, tecrek-it yiwet n temsalt d winna i d-iheggan timlilit-a, Mass Arezki ABOUT. Acu i ten-icerken ? Akken neẓra, Arezki ABOUT d yiwen umeḥbus gar 24-nni i wwin γer lḥebs deg useggas 1980. Ma d Mass BENHENNI yella d ’’procureur général’’ di Tizi Wezzu deg yiseggasen-nni n 1970. « Asmi tekker di Tizi Wezzu, yufa-yi-d lḥal uγaleγ xeddmeγ di tselwayt n tegduda, d nekk i yettukelfen s temsalt-nni n 1980. Tella tucḍa d tameqqrant s γur imḍebbren di lweqt-nni. Ayen yeḍran di 1980, ciṭ kan yeḍra-d uqbel deg useggas n 1976 s temsalt-nni n temdint n Makouda. » Akka i aγ-ḍ-yenna Mass BENHENNI mi i t-nesteqsa γef tefsut n yimaziγen. Ma d Mass ABOUT yenna-d : « d taswaεt kan i aγ-d-yessemlalen, ur yelli wayen-nniḍen… » Akken yebγu yili timlilit tεedda di teswiεt igerrzen d waṭas n usirem εlaḥsab n wayen i aγ-d-tenna Drifa, yiwet yellan di temlilit : « anwa ara as-yini ad d-yaweḍ wass-a…u mazal lxir γer zdat. »
Hocine.M