‘’Lemmer kan medden ad walin Sliman ΣAZEM d anaẓur, ad xḍun i wayen-nniḍen, ad mmeslayen γef wayen yecna…’’ akka i tesḥassef Tawes yiwet iḥedren tajmilt i as-yuγalen i ucennay ameqqran Sliman ΣAZEM. Deg wahil n sin wussan-agi (24/25 di yebrir 2011) i d-yettwaheggan sγur tanmehla n yidles n lwilaya n Tizi Wezzu akked tkebbanit EMEV llan-d yisaragen d timsikent n tmeddurt n ucennay-agi. Ayen yeṭṭfen s waṭas ddehn n wid i d-yusan ad ẓren isaragen d ččaqlala i d-xelqen daxel n tzeqqa n uxxam n yidles Mulud Mεemmri sin yimdanen i yettmeslayen s yisem n yimjuhad. Σlaḥsab n yimdanen-agi, Sliman ΣAZEM yedda d iḥerkiyen. Wwin-d yid-sen yiwet n tugna anda Sliman ΣAZEM icennu i yiḥerkiyen, εlaḥsab-nsen ayagi d ttbut belli yedda yid-sen. Imdanen yellan deg usarag-agi ur ten-yeεğib ara waya, dγa tella-d tiẓzift γef ‘’yimjuhad-a’’. Cwi kan yessemsawi taswiεt Abdennour Abdeslam imi d netta i d-yewwin ass-nni asarag γef Sliman ΣAZEM. Gar wayen i d-yenna:’’mi nesεa argaz, d nekni ara d-yekren γur-s akken ad t-ncemmet. Rnu γef wanect-a, acuγer ulac anwa i d-yekkren asmi i yeḍleb Belkhadem deg unujmuε n yineγlafen deg useggas 2001 di lεesker akken ad bumbardin tamurt n leqbayel ? Yaxi yettmeslay s yisem n FLN…kunwi (yeqseḍ-d sin-nni n yimjuhad i d-yewwten di Sliman) tellam di FLN.’’
Ma d Rachid Mokhtari i d-yemmeslayen γef Sliman ΣAZEM deg yiwen usarag-nniḍen, yenna-d :’’ ad neğğ amezruy i wid teεna temsalt, nekni teεna-aγ kan temsalt n wayen yecna.’’
Di taggara n sin wussan-agi nemlal Mass Amirouche win i d-yeswejden tajmilt-agi yenna-aγ-d :’’akken yebγu nexdem-as i dda Sliman, yuklal kter. Nesḥassef aṭas imi ur teḥdiṛ ara uletma-s, xas akken neεreḍ-itt-id ur d-tusi ara. Rnu γef wanect-a ur nwala ara sin-nni n yisura i d-nhegga. Yettuγaḍ lḥal ciṭ…’’
Ula d Ramdane yesseḥbaber γef Sliman ΣAZEM s tezlit n Matoub :
‘’nnan-as medden iḥerrkel
netta ur yexdim ara,
Lemmer yella ciṭ n leεqel
Yakk yecna γef lḥuriya
Imi nekni nedderγel
Nettarra argaz d cmata
Win d-yusan ad aγ-imel
Amek ara teddu tmurt-a’’
Hocine .M