Di tufra n tufra Ufiɣ-d iman-iw tufra Гas ur beɣiɣ tufra….
Awal ibedd ɣef awal, yegga ttɛed i usefru. Tasa icelḥen d iftaten tetteḥekkir ansi ara d tekk tafat. Ger ifyar i d-yewwin ṣḍa n tiɣri tufirt, tezga-d Ḥakima Metahri d tiɣwist n tiden akken yessusmen wer lebɣi akkend ad tinni s yiles –is timsal yedlen ddew ujalab n leɣrur : « nekk d tin yettḥulfun s wayen id -aɣ d yezin , d tin yesurgen imeṭṭi s tedwet akked d yimru acku di kra n teswiɛin d asefru i d- ddwa n tlufa , d netta i-yesenqasen taẓayt n yir wussan i d –idehmen yemdanen akked d igduden ».
Ma riɣ tama anda tekna
Dɣa mi tekna tekmen
Tekmel texla terna
Tebeber tedda akken
Akkin daxel i tebna
Ɛemdeɣ dreɣ s wallen
Ɣef azref yecgen deg yillel n tatut, ɣef tilelli yegnan deg ussu d yessa meɣrud, yella umyag akken ad yezwi takka n iseggasen terqem tacmet ɣef allen yettnadin awali. Tenna-d Ḥakima : « tufra d asefru yellan ger tilawt akked d targit . Yella d innig , yella d tugna n yixef yettwecublen , yekka-d deg uskasi ger yiman n umdan d timad-is ».
Ardemani yenṭeq yimmi
Awal ugar iles
Yeduri daxel i yettɣimi
Yezdeɣ yecεel d times
Acengu askil-iw at yettsami
Xenqeɣ ula d lxiq yekmes
Ɣer Ḥakima asefru yella d afus yeserqiqisen ixef , yesnefsusuy ɣef ul , ɣef umdan, ɣer timeti urfan d tmedurt, yettra taɛkemt n tudert teshel i unerfud. Asefru d amendil yeskawayen imeṭṭawen deg udem wecmen lehmum. D asaru yettlen ɣef lqed akken ur yettluɣẓam umdan. Asefru yettleqim asirem, yessussum lejruḥ, yettara leḥzen d lferḥ. Yettmudu telqaq i laɛmer yemɛbaren akked ussan.
Laqayeɣ leqay wazal-iw
Ma rniɣ derbeɣ waxreɣ
Yegga-as lebɣi-w i yiman-iw
Mačči d nekk mi d-tura
Tira textari-tt i yisem-iw
U daɣen i tugdi n tmara
Ɣef awal yenerna wawal, acku ɣer tamedyazt taqbaylit d ttin yettcudun agdud ɣer tazmert-is. Awal yettili nnig n umdan, nnig iɛewiqen, yis i nettqazem ayen yellan d wayen i d-iteddun. Awal yemzer i cwal yezmer i lehna. Win yesqdacen awal yettuɣal d aqrib ɣer rebbi. S wawal i tedda talsa, s wawal i tella tmusni, s wawal i nettemyeɛqel, s wawal i nettemsawal. Awal yella i lmendad n tudert :
Imi asirem d targit
Ma d afraz d uzref yeɣli
Yeǧǧa-t yedder yefr-it
Yefer ur yufi tilelli
Iɣil idarɣel yemesx-it
Deffir n temuɣli i d yettwali
Di tufra n tufra, tufrar-d Ḥakima s yifyar i d- ifalen am ubeḥri ɣef ṛuḥ , ifyar i d -yettmalen ccuq n tmena amer imraren yeqrasen ge ul akked d tasa ad uɣalen d wid yemlalen. Tikwal asefru ma yal yugmed timseda- ines deg uɣbalu n tidet akked d tezdeg , asefru am wint yugar aɛbar . Yugar kra yellan dkra ara d yillin. Tamattent taguni yal taɣawsa. Kulci yettmettat ala awal ḥedd ma t-yeɣḍel. Di tufra n tufa itri aleqaq yuzel di tignawt n tira akken ad yesmir azal n wawreɣ ɣef yixef n Methari Ḥakima acku tikwal ixef iḥekku i yixef tid yakk yefran :
Mi tura fell-i tufra
Anda nniḍen ur teri
Tǧemel-iyi assen s temara
Iman-iw deg-s yaruri
Tefrit,tedlit,ṣṣura
Aṭas ur yeli d amsari
Ait Slimane Hamid