Seg wass n letnayen yezrin, ɣef teɣzi n tlata n wussan, Asqamu Unnig n Timmuzɣa ihegga-d yiwet n tannant n usileɣ i wazal n 42 n yiselmaden n tmaziɣt di Tubiret. Timlilit-a i yetturajun acḥal aya, d tagnit i yettunefken i yiselmaden iwakken ad gemren kra n tmusniwin ara yessifsusen taɛkemt fell-asen, ladɣa wid yellan yakan d imaynuten, am wakken ara lemden kra n tarrayt deg uḥric n useqdec n tsekla. Deg wass amezwaru n tannant, d Mohammed MAKHNACHE, aselmad di tesdawit n Khenchla i d-yewwin awal ɣef wudem n tutlayt. Anda i d-ibeggen kra n wudmawen n tutlayt sumata. Syen akkin, d Massa KEMKEM i d-yemmeslayen ɣef tutlayt d wayen i tezzuɣur. Ahat, d ayen ara yeǧǧen iselmaden ad gen tiqenṭyar gar tmaziɣt d tutlayin tiyaḍ. D isental i ijebden mebla ccekk lwelha imi d asnerni deg tmusniwin yerzan tutlayin. Iwakken ayen yellan d awal ad yeqqel d allal i uselmed, wid yellan deg temlilit-a ɛerḍen ad sqedcen kra n yiḍrisen iwakken ad gen assaɣ ɣer wayen i slan tasebḥit. Tameddit n wass amezwaru tella- d tegnit i usqerdec n kra n temsal yerzan aselmed n tmaziɣt d wuguren i d-ttmagaren yiselmaden deg unnar. Ass wis sin, d yiwen seg yiselmaden n tesdawit n Bgayet, BALA Sadek, i d-yemmeslayen ɣef yiswiyen n tmetti d yidles n tsekla. Dagi, d tagnit daɣ i yiselmaden yesqerdcen aṭas n temsal i s ara qablen tarrayin timaynutin deg uselmed n tsekla. Am wakken i tella d taḍwiqt i usexdem n yiḍrisen akken iwata berra i tekti tamatut, akken i tella seg zik. Lxedma tkemmel s tseqquma i sseddan yimaswaḍen n tutlayt tamaziɣt. Dagi, iselmaden cudden ayen i slan ɣer tutlayt i sselmaden. Acku, isdawiyen wwin-d awal ɣef yiswiyen n tsekla deg tutlayt sumata, ma d iselmaden ɛerḍen qnen aya ɣer wayen i sselmaden. Ass aneggaru n tannant yella-d wawal ɣef wallalen ara yettwasxedmen deg uselmed n tmaziɣt. Deg-s i d-walan yiselmaden yiwen n uḥric seg usaru « Adrar n Baya », anda daɣ i ɛerḍen amek ara d-ɣren tugniwin d wamek i zemren ad tent-sxedmen deg tneɣriyin nsen. Aḥric-a yella-d s lmendad n Mass Hamzaoui. Ɣer taggara n wass, d amaray amatu n tmehla n usedwel n Tubiret i d-yerzan s asensu n Sofy iwakken ad yesnemmer kra akk n wid yellan deg temlilit, daɣ ad yeḥḍer i keffu n leqdic.
Sylia. M