Ussan-agi yeffeɣ-d ɣer tezṛigin Aframed umud n yisefra n umedyaz Youcef MERAH s uzwel Tuccar n tsusmi (les griffes du silence). Amud-a yettuneḥsab d wis sin i d-yessufeɣ umeskar (l’auteur), isedda-d deg-s azal n 63 n yisefra i yura ɣef waṭas n yisental yemxalafen, anect-a dayen ara yeǧǧen imeɣṛi ad yemlil akked waṭas n yisuyas (scènes) yeɛnan tudert, ama d timsal n: tmetti, tsertit neɣ n tayri s wudmawen-is yemxalafen akked daɣen layas d ussirem. Amezwaru seg yisefra-agi yefren-it umedyaz d azwel n umud-a, ma d angaru isemma-yas Timuɣliwin (réflexions diverses) ideg yeɛreḍ ad isukk tiṭ ɣef ayen akk iḥuzan tillit (l’existence) n umdan d wayen-nniḍen, amedya deg yiwen n ufyir icuba tudert ɣer tqeffalin n upyanu, kra seg-sent d timellalin, ma d tiyaḍ d tiṣeṭṭafin…Tamedyazt-agi i yettwarun s tutlayt tafṛansist d ayen ara yesnernin tamkerḍit n tsekla tazzayrit s umata, yenna fell-as umedyaz/aneɣmas Boualem BOUAHMED: » win ara yeɣṛen adlis-a (taktabt-a) mačči d tikli ɣef tefdent ara yelmed maca ad d-yawi zhir di tikli-s amer ahat ad d-yaff tisura i yir liḥala i tettidir tmurt-nneɣ di tallit-agi « . Di taggara ad nini dakken amedyaz Youcef MERAH ilul di temnaḍt n Souk El-Tenine (Bgayet) deg ass n 13/08/1972, d ameɣnas n tugdut, tura akka d aselmad deg tesnawit…Taɣuṛi igerrzen.
Farid Lahouari