Y. AIT YAHIATENE d amaswaḍ n taεrabt deg uγerbaz amenzu di lwilaya n Tizi Wezzu. Yettwassen aṭas s tidwilin-is di radyu tis snat deg yiseggassen-nni 1990. Di tidwilin-a yettawi-d awal γef tsekla timawit d tγerma s umata…yura nnig n 32 n tmezgunin, gar-asent ‘’Lalla Faḍma n Sumer’’, aṭas diγ n yidlisen, nezmer ad d-nader ‘’amezruy atrar’’. Akka tura ihegga-d yiwen ‘’umezrar’’ (awal-a yekka-d sγur-s) (feuilleton) n wazal n 28 yiḥricen i tiliviyu tis 4 n tmaziγt. Aya d ayen yeεnan kan tutlayt tamaziγt, ula s taεrabt yura aṭas n yidlisen, amur ameqqran icud γer wahil n uselmed.
Meεna ayen i aγ-yeğğan ad nerzu γer umaswaḍ-agi d assaγen igerrzen i yesεa netta d yiselmaden ladγa wid-nni n tmaziγt. Γef wakken i aγ-d-nnan, leεmer yesεa uselmad n tmaziγt ugur di tama-nni yeṭṭef Mass YAHIATENE imi di tazwara n useggas yesddukel-d akk iselmaden n tmaziγt d yinemhalen n yiγerbazen imenza fran timsal akken ma llant.
Di taggara-a, d iselmaden-is n taεrabt i as-yerran tajmilt imi yewweḍ 60 yiseggasen di leεmer, ad yeḥbes, d ‘’tasdaγt (retraite), deg waggaur n γuct i d-iteddun. I lmend n waya, yewwi-asen-d yiwen usefru iwumi ḥulfan s waṭas lecyax-nni, γef wakken i aγ-d-nnan :
aql-aγ γef tizi n rwaḥ
leεmer yewweḍ ar settin
nebda aselmed γef εecrin
deg useggas n waḥed u sebεin
rebεin εeddan am targit
d ta i d lbaḍna n ddunit
zzman γef yixef ḥekker-it
lefraq bezzaf yesseḥzan
seg-wen aṭas i yecfan
tejra n tmussni i awen-iγzan
timilit taneggarut
awit sγur-i ttbut
ssmaḥ gar-aneγ ur yettfut
tizi i lxedma i d-ḥudd
tussna i yinelmaden i nmudd
i nebda aselmed i neffud
si leεmer iseggasen kfan
ur d-yettuγal wayen iεeddan
si leεmer neqqsen wussan
yid-wen ay iselmaden n Tizi
azal ay nefka i unadi
wid ar deffir ur nezzi
i aγ-yessemlalen ass-agi
d rḥil nekni ay nettheggi
ulac taswiεt am tagi
Hocine . M