Deg tlemmast n temdint n Bgayet, deg uγerbaz alemmas Lhadi Zerruqi, tuγal-d temsalt n usuter n tmaziγt gar yifassen n lwacul ur newwiḍ 14 n yiseggasen ! Arrac-a, s ddaw n ufus n uselmad-nsen n tmaziγt mass Zidan Yasin suddsen iman-nsen s waṭas n yirmuden (activités): ccna, amezgun, ajmaε n yisallen γef tmaziγt, … Lḥasun mačči d yiwet ! Nwala-ten deg tefsut n useggas-a deg uxxam n umezgun n Bgayet, sdat n yimawlan-nsen umi slemden tutlayt-nsen. S yiselsa (lqec) n Leqbayel, “tibǧawiyin-a timecṭaḥ” banent-d am akken d tisekrin, wid akk iḥedren di tzeqqa n TRB ideg llan yimawlan n warrac-a, ḥulfan amzun d lmalaykat tiεzizin i sen-d-yersen γef usayes(scène) , mačči d yiwen i ten-yesnemmren. Ussan-a mi nella di temdint n Bgayet, nmuger-d kra seg lwacul-a i iseḥren imdanen ladγa imezdaγ n lḥumat tinesliyin n temdint i ten-iḥmlen s waṭas segmi akken i walan tirmad-nsen i xedmen di TRB akked uγerbaz alemmas Lhadi Zerruqi ilmend n usmekti n umulli wis 31 n tefsut n yimaziγen. Arrac-a i d-nemlal, sbegnen-aγ-d lferḥ-nsen s tmaziγt d leḥmala-nsen akked d leqder i as-mudden i uselmad-nsen, netta daγen d abgayti( abǧawi) mass Zidan Yasin, mmi-s n temdint n Bgayet, i yebdan ilindi kan aselmed n tmaziγt. Ger wayen yefkan lwelha deg ahil i xedmen warrac-a, d taceqquft n umezgun “win yeččan yečča, win ur nečči tarbut tekkes” d awelleh i yinelmaden akken ad ḥercen deg leqraya, taceqquft-a tekfa s yisefra icebḥen i d-nnant “Xuxa tagurriεt” d temdukal-is.
Di taggara, inelmaden-a, fkan-d awal ladγa i wid i teεna temsalt i yellan ḥeḍren din (ideg llan yimawlan-nsen), awal ideg ssutren deg yimḍebren n tmurt akken ad lhin d usnerni n tmaziγt. Gar wid i nesteqsa seg wid yufraren (i usmekti ugar n 25 n yinelmaden i yufraren wwin arrazen seg ufus n uselmad-nsen), Inas Me εziwa, nettat tenna-yaγ-d:” tamaziγt d tutlayt-iw, ur zmireγ ara ad tt-nekreγ ” akka daγen i d-kemlent temdukal-is am Dunya, Naǧat, Nasima, Haniya d tiyaḍ.
Akken ma llan, lwacul-a id wi d-newwi awal, steqsayen dacu i zemren ad xedmen iwakken ad as-d-rnun afud i tmaziγt, mmeslayen-aγ-d s lεez d lferḥ ameqqran imi xedmmen leqdicat-a idelsanen γef tmaziγt. Aya mačči kan d amedya yeddren γef uǧuǧeg d unerni n uselmed n tmaziγt, tutlayt-nneγ tayemmat, maca d tamsalt n lebγi d takayt( volenté) i sεan yinelmaden-a akked uselmad-nsen mass Zidan Yasin yellan d yiwen seg yimeγmasen n tmaziγt ur nεeyyu. Akka i d tamdint n Bgayet, di tallit talemmast imezdaγ-is saγen tacemmaεt n tmussni i yes-s iwala Iben Xeldun d Leonardo Fibonacci d wiyaḍ ; ass-a daγen s yimeγmasen yecban Zidan Yasin d yinelmaden yecban : Inas, Dunya, Naǧat, Nasima,Haniya,… εawden ceεlen tacemmaεt n temdint n Yemma Guraya, akken ad teǧǧuǧeg tmaziγt , tutlayt-nneγ tayemmat imi γer sdat ala nettat kan ara aγ-inefεen.
Mokrane Chikhi