D imeyyaten i d-rzan, lǧemɛa iɛeddan , s axxam n yelmeẓyen n At Yanni, ḥedren tajmilt i Yaḥya DEḤLAL, Taḥya akken i s-qqaren medden. Iɛac di taddart n At Leḥsen. Deg yimi ara d-yekker d netta icennu kan. Anwa ur nesli i ṣṣut-is ? Anwa ur yezzuzen s ccnawi-s ? Yezga yefṛeḥ i medden meṛṛa. Lǧemɛa iɛeddan, meẓẓi meqqar, ssaɣen tiftilin i yxulaf n ccna n teqbaylit. D tagnit i d-yessemlalen ddeqs n icennayen n At Yanni. Ɣef lxemsa n tmeddit tuli-d tarbaɛt n lmusiqa « Amedyaz » ṛzan asalu i ycennayen iḥedren tameddit-nni. Si ccnawi tiqdimin i d-yewwi Slimane METREF(Slimani) : walaneɣ ak walaneɣ, ccix ameqran ; ar Said GHEZLI i ɣ-yerran ar ccnawi n zzawiyya n lḥaǧ Belqasem ; Lɛarbi n Igawawen i yecnan « ṛuḥ a mmi ṛuḥ », refdent tlawin d iseggasen-aya tura, deg wuraren at zik, yd rriḥa n zzawiyya, d rriḥa n Brahim IZRI, Lbudala, sseyyaḥa, ccerwen wid sent-yeslan. Tameɣra tkemmel s ṣṣut n Chabane SADDAT s teqdimin n Wakli YAHYATEN : ay axxam d acu k-yuɣen ?, nemfaraq d tiyaḍ nniḍen. Tagnit d afares, d timlilit n idelsan, unuɣ d amxalef mi d-yuli Jeremmy, i d-yusan si La Bretagne, s ṣṣut-is ḥlawen, s iḍarren, s ifassen, yewwi kra iḥedern ar ccnawi n wagad yugin ddel, n wid yebɣan tudert i yedles-nnsen. Ddeqs n yelmeẓyen i yecnan : Mayless, Kader LALIAM, Moumouh GHEZLI, d Hmimiche (Ahmed HAMANI), i d-yewwin abrid n tarbaɛt Afus, n Brahim IZRI d Yidir.
Tameɣra tgerrez s terbaɛt n lmusiqa « Amedyaz » : GHEZLI Belaid, HARIK Mouloud, SENNAN Slimane d Mouloud, xedmen seg wul, awi-d kan ad yidir Tahya, deg wulawen n wid-is.
Tajmilt i d-heggant tdukliwin Relais et Solidarité n At Yanni, d Baba Inuba n Franṣa, s leɛnaya n ucennay Yidir. D isem-is i d awal-is, akken ad yidir Tahya, deg wulawen n medden meṛṛa.
Zira