Taɣiwant n Beclul i yettwaḥersen acḥal aya deg uḥric n lebni n tnezduɣin atta-n tufa-d kra n tifrat i uɣbel-a, ɣef leḥsab n wakken i aɣ-d-yenna uselway-is, Lɛid Belkadi.
Ihi, tasqamut n tɣiwant yennejmaɛen acḥal d aabrid tegzem-itt di rray iwakken ad thudd akk tiḥuna yellan yakan seg yiseggasen imezwura n timunent di tlemmast n tendint yerna d ti dur ncebbeḥ ara taɣiwant segmi d tiqdimin, ula d sqef nsent d aqermud-nni tuli tebrek.
Ɣef waya, yettuhegga-d deg umḍiq-a yiwen n usenfar n lebni n 100 n tnezduɣin, akk d lmaḥellat i tjara ara ṭṭfen wigi iwumi ara ttwahuddent tḥuna.
Dima ɣef leḥsab n yisallen i d-newwi ɣer yimḍebber amezwaru n tɣiwant-a, aṭas n yisenfaren i d-yettwaheggan yerna d wid ur nettɛeṭṭil ara ad bdun.
Sylia. M
Saharidj
Tafeska tamenzut i usnerni n tmerrit
Deg wussan-a yezrin, taɣiwant n Saharidj i ibeɛden ɣef wazal n 50 n kilumitr tama n usammar n Tubiret thegga-d yiwet n temlilit i d-yesdukklen iselwayen n tɣiwanin n twilayt ilmend n tirza i d-yexdem ɣer din uneɣlaf n tmerrit. Tinnubga-agi ur d-telli ara kan akka i ucebbeḥ n tegnit, maca, imḍebbren n tɣiwant-a heggan-d yiwen n usenfar s wazal-is ara sqerdcen di tegnit-a. Ihi, inebgawen n Lemṣara, akken i as-ssawalen at zik, ḥeḍren i beddu n yiwet n tfaska yeɛnan asnerni d ugemmu n tmerrit deg yidurar. D yiwen n usenfar ara d-yawin agummu i temnaḍt-a, imi d tin ikesben imukan ara ḥwiǧen imerriyen. Ma nebder-d Tala Rrana, ahat amkan-a yezmer ad iger irebbi i waṭas n yisenfaren ma dɣa ttunefken-as ttawilat iwulmen. Lukan kan ad d-nesmekti d akken uqbel ad tecɛel tmes n rrebrab di tmurt nneɣ, amkan-a yettuhegga i lebni n yiwen n sbiṭar i wid iḥuza waṭṭan n buneggaf. D yiwen n ṛṛay igerzen, imi leɛli n umḍiq-a ad yessixfef taɛkemt ɣef yimuḍinen.
Ɣef leḥsab n yisallen i d-nesqucceḍ, tirza n uneɣlaf n tmerrit ɣer tɣiwant n Saḥaridj d tin ara yesǧehden ifadden i yimḍebbren-is iwakken ad ddun deg lecɣal n usenfar-a.
S.M